69796
उत्सव पुनर्चक्रीकरणाचात
कोल्हापूरकरांकडून चार टन कचरा दान
सकाळ वृत्तसेवा
कोल्हापूर, ता. ११ ः अवनि व किर्लोस्कर ऑईल इंजिन्सतर्फे आयोजित ‘उत्सव पुनर्चक्रीकरणाचा‘मध्ये उभारलेल्या पुनर्चक्रीकरणाच्या भिंतीत कोल्हापूरकरांनी चार टन पुनर्वापर करता येणारा कचरा जमा केला. केवळ चार दिवस राजर्षी शाहू स्मारक भवनच्या बाहेर भिंत उभारली होती. या मोहिमेत घरातील जुने कपडे, ई-वेस्ट, खेळणी, पुठ्ठा, रद्दी यासह इतर वस्तू दान केल्या.
पर्यावरण दिनानिमित्त ५ जूनला ही भिंत खुली केली. पहिले दोन दिवस प्रतिसाद थंड होता. शनिवारी, रविवारी सुटीच्या निमित्ताने कोल्हापूरकरांनी घरातील जुन्या वस्तू पुनर्चक्रीकरणासाठी आणून दिल्या. पालकमंत्री प्रकाश आबिटकर यांनीही या मोहिमेला भेट देऊन कौतुक केले. या मोहिमेला मिळालेला प्रतिसाद पाहता निर्माण चौकातील अवनि संस्थेच्या खत निर्मिती प्रकल्पावर आणि शिरोली जकात नाका इथे कायमस्वरूपी ही भिंत सुरू ठेवणार असल्याचे संस्थेच्या अध्यक्षा अनुराधा भोसले यांनी सांगितले. या भिंतीच्या माध्यमातून जमा झालेल्या कचऱ्याचा पुनर्वापर करण्यात येणार आहे. मोहिमेसाठी वनिता कांबळे, साताप्पा मोहिते, अक्षय कांबळे, नयन जाधव, सुरेश बालुरगी, वैजंता गुंडेवाडी, मंगल कांबळे, बनाबाई कांबळे यांनी परिश्रम घेतले.
------
असा झाला जमा कचरा
*कपडे - २ टन
* रद्दी - ७०० किलो
* इलेक्‍ट्रिक वस्तू - ४०० किलो
* प्लास्टिक - ४०० किलो