71772

इचलकरंजी ः तांबे माळ परिसरातील शाळा क्रमांक २३ च्या मैदानावर करण्यात येत असलेला रस्ता.

महापालिका शाळेच्या मैदानावर
खासगी शाळेसाठी रस्ता
खेळाडूंचा जोरदार विरोध ; प्रशासनाकडून काम थांबविले

इचलकरंजी, ता. १९ ः येथील महापालिकेच्या तांबे माळमधील शाळा क्रमांक २३ च्या मैदानावर खासगी शाळेच्या सोयीसाठी रस्ता करण्यात येत आहे. त्याला परिसरातील खेळाडूंनी जोरदार विरोध केला. याबाबत खेळाडूंनी महापालिकेत जाऊन निवेदन दिले. त्यानंतर अतिरिक्त आयुक्त सुषमा शिंदे यांनी संबंधित रस्त्याचे काम थांबविण्याचे आदेश बांधकाम विभागाला दिले आहेत.
शहरातील तांबे माळ परिसरात महापालिकेची शाळा क्रमांक २३ आहे. या शाळेच्या इमारतीतील काही भाग खासगी शाळेला भाडेतत्त्वावर दिला आहे. पावसाळ्याच चिखल होत असल्यामुळे या खासगी शाळेत ये-जा करण्यासाठी मैदानातच रस्ता करण्याचे काम सुरू केले होते. हा प्रकार परिसरातील खेळाडूंना समजला.
सर्व खेळाडू एकत्र येत रस्त्याचे काम थांबविले. यावेळी वातावरण तापत चालल्यामुळे पोलिस दाखल झाले. त्यानंतर गजानन महाजन यांच्या नेतृत्त्वाखाली खेळाडू महापालिकेत गेले. तेथे अतिरिक्त आयुक्त शिंदे यांना निवेदन देऊन रस्ता करण्यास विरोध नोंदविला.
या मैदानावर छत्रपती संभाजी महाराज चौक, दातार मळा, तांबे मळा, कुडचे नगर, घोडके नगर, लिंबु चौक, संत मळा, नाईक मळा, संग्राम चौक, गुरुकन्नननगर, षटकोन चौक, काडापुरे तळ यासह परिसरातील खेळाडू दररोज सराव करतात. दोन जलकुंभ बांधल्याने मैदानाचा काही भाग व्यापला आहे. रस्ता केल्यास मैदानाची जागा आणखी कमी होऊन मैदानात पावसाचे पाणी साचणार आहे. त्यामुळे खेळणे शक्य होणार नाही, असे निवेदन नमूद केले आहे.

कोंडेकर