लोगो ग्राऊंड रिपोर्ट
--
फोटो 73303

महाविद्यालयांबाहेर टोळक्यांचा वावर
कोणाचेच नियंत्रण नाही? शाळा परिसरात रोडरोमिओंचा त्रास
सकाळ वृत्तसेवा
कोल्हापूर ः विचित्र हेअरस्टाईल, डोळ्यांवर गॉगल, हातात नॅपकिन, वाढवलेली शेंडी, पायात ब्रॅन्डेड स्लिपर घालून शाळा-महाविद्यालयांच्या आवारात ‘टोळक्यांचा’ वावर वाढला आहे. महाविद्यालयाशी संबंध नसणारे ‘रोडरोमिओ’ दिवसभर घुटमळताना नजरेस पडले. पोलिस किंवा निर्भया पथकाचे वाहन येताच गल्लीबोळात लपून पुन्हा गर्दी करू लागले आहेत. शहरातील बहुतांश महाविद्यालयांबाहेर हेच चित्र दिसून येत होते.
वर्चस्ववादातून २२ जूनला आदित्य कॉर्नर परिसरात तरुणावर तलवार हल्ला झाला. सकाळी परिसरातील एका महाविद्यालयाबाहेर झालेल्या किरकोळ भांडणातून गुंडांनी यात सहभाग घेतला. पोलिस रेकॉर्डवरील गुन्हेगार गब्बर सूर्यवंशी व त्याच्या साथीदारांनी हा तलवार हल्ला केला. पोलिसांनी पाच जणांना अटकही केली आहे; परंतु महाविद्यालयीन वर्चस्ववाद ही काही वर्षांतील पोलिसांची डोकेदुखी बनली आहे. महाविद्यालयांशी कोणताही संबंध नसलेल्यांकडूनच असे उद्योग सुरू असून, पोलिसांनी लक्ष देण्याची आवश्यकता आहे.
--
गुंडांच्या नावाने ग्रुप...
शिवाजी पेठेतील महाविद्यालयाबाहेर थांबणाऱ्या दोन टोळ्यांत गेल्यावर्षी वाद झाला होता. यातून सुजल कांबळे या तरुणाचा टिंबर मार्केट परिसरात खून झाला. महाविद्यालय आवारात गुन्हेगारी प्रवृत्तीचा शिरकाव झाल्याचे दिसू लागले आहे. शिवाजी पेठेत अनेक नामांकित शाळा, महाविद्यालये आहेत. या महाविद्यालयाबाहेर वाढदिवस साजरे करून आपल्या टोळीच्या नावाने दंगामस्ती करण्याचे प्रकार सुरू आहेत. खरी कॉर्नर, गांधी मैदान, कोळेकर तिकटी परिसरात असे घोळके नजरेस पडले.

पोलिस वाहने
पाहताच तारांबळ
ताराबाई पार्कातही अशी स्थिती आहे. मेरी वेदर ग्राऊंड, प्रादेशिक परिवहन कार्यालय, आदित्य कॉर्नर अशा ठिकाणीही विनाकारण थांबलेले अनेक तरुण दिसून आले. या तरुणांच्या भोवतीच महाविद्यालयीन विद्यार्थ्यांचे गट थांबून होते. जिल्हाधिकारी कार्यालयाकडून आलेल्या पोलिस वाहनाला पाहून काहीजण सावध होऊन बाजूला गेले. पण, काही वेळातच पुन्हा ते आपापल्या ठिकाणी येऊन उभे राहिले.

बस थांब्यावर गर्दी...
शाळा, महाविद्यालयांतील विद्यार्थिनी थांब्यावर बसची प्रतीक्षा करत थांबलेल्या असतात. बस थांब्यासमोरच वाहने उभी करून त्यावर बसून राहणारेही अनेकजण दिसून आले. खासबाग मैदान, कोळेकर तिकटी, बिंदू चौक, लुगडी ओळ, टाऊन हॉल थांबा, गंगावेस, रंकाळा स्टॅन्ड, उषा टॉकीज, स्टेशन रोडवरील बस थांब्यांवर ‘रोडरोमिओ’ची घुटमळ नजरेच भरणारी होती.

शालेय विद्यार्थ्यांवरही प्रभाव
सायंकाळी शाळा सुटण्याच्या वेळेसही शाळेच्या परिसरात ‘टोळक्यांचा’ वावर वाढला आहे. शालेय विद्यार्थ्यांना बोलावून त्याच्याकडूनही ‘विशेष’ माहिती घेतली जाते. काही शालेय विद्यार्थ्यांनीही अशी गुंडप्रवृत्तीना ‘फॉलो’ केल्याचे दिसून येत असून, त्याचा समर्थकांसोबत उभे राहणे या मुलांना भावते. शाळांबाहेरही असेच चित्र दिसून येत होते.