विद्यार्थी हेच माझे
दैवत ः कुलकर्णी

मुत्नाळला विद्यार्थी, पालकांकडून गुरुजनांचा सत्कार

सकाळ वृत्तसेवा
नूल, ता. ३ ः ‘शिक्षकांचे भले बँक बॅलन्स नसेल तरी चालेल. मात्र, अनेक कर्तृत्ववान विद्यार्थी निवृत्तीनंतर शिक्षकांना भेटतात, त्यावेळी त्या शिक्षकांना वाटते की, माझ्याएवढा श्रीमंत कोणीही नाही. विद्यार्थी हेच माझे खरे दैवत आहेत,’ असे उद्‍गार गो. म. कुलकर्णी यांनी काढले.
मुत्नाळ (ता. गडहिंग्लज) येथे आयोजित सत्कारप्रसंगी कुलकर्णी बोलत होते. माजी विद्यार्थी मार्तंड जरळी यांनी स्वागत केले. कुलकर्णी म्हणाले, ‘विद्यार्थी, ग्रामस्थ यांनी मला सुरुवातीपासूनच समजून घेतले. मला प्रेम दिले. माया दिली. त्यांच्या आपुलकी, सदिच्छेमुळे मी वयाच्या ९५ व्या वर्षीही आनंदी, सुखासमाधानात आहे. याचे संपूर्ण श्रेय येथील विद्यार्थी व ग्रामस्थांना जाते.’
पाटील म्हणाले, ‘येथील विद्यार्थी प्रामाणिक असून, कष्ट करण्याची तयारी आहे. माजी विद्यार्थी विविध क्षेत्रांत उल्लेखनीय कार्य करत आहेत. याचा अभिमान आहे.’ एल. टी. नवलाज, बसवंत चनवीर, मारुती मुरगी, बापूसाहेब पाटील यांची भाषणे झाली. यल्लाप्पा कांबळे, अरुण पाटील, अक्षय पाटील, केंपाना मुगळी, भीमापा जरळी, सुरेश हुली, संभाजी नाईक, केंपाना जरळी, करबसापा जरळी, संतोष कोळी, उमेश रामजी आदींसह ग्रामस्थ उपस्थित होते. रावसाहेब मुरगी यांनी सूत्रसंचालन केले. रमेश सावंत यांनी आभार मानले.