महापालिका फोटो
--
घरगणनेत ४६ हजार मिळकती ‘बेपत्ता’
घरफाळा विभागाकडे नोंद नाही; वेगवेगळ्या कारणांनी घरफाळा बुडीत
सकाळ वृत्तसेवा
कोल्हापूर, ता. ७ ः महापालिकेला एक लाख ७१ हजार मिळकतींकडून घरफाळा मिळत असला तरी तब्बल ४६ हजारांवरील मिळकतींची नोंद घरफाळा विभागाकडे नाही. सध्या सुरू असलेल्या जनगणनेतील घर गणनेतून ही बाब उघड झाली. त्यात दोन लाख १७ हजारांवर मिळकतींची नोंद झाली आहे. या पाठीमागे कारणे वेगवेगळी असली तरी त्यातून महापालिकेचा घरफाळा मात्र बुडत आहे.
महापालिकेतर्फे शहरातील जनगणनेतील घरांची गणना करण्याचा पहिला टप्पा पूर्ण झाला आहे. त्यात दोन लाख १७ हजार ४४० वर मिळकतींची संख्या पोहोचली आहे. प्रत्येक गटात किमान १८० व २०० पर्यंत घरांची नोंद झाली आहे. याप्रकारे १२०१ गट तयार केले आहेत. यात स्वतंत्र बंगले, घरे, अपार्टमेंटमधील फ्लॅट याबरोबरच झोपडी, शेड, केबीनही धरल्या आहेत. पक्क्या बांधकामाबरोबर कच्ची बांधकामांचीही मोजणी केली आहे. ही मोजणी पाहिल्यानंतर कमीत कमी ४६ हजारांवरील मिळकतींची नोंद घरफाळा विभागाकडे नसल्याचे स्पष्ट होत आहे. या मिळकतींचा घरफाळा जमा होत नाही..
.....
कोट
अनेकजण एका इमारतीतच स्वतंत्र राहात असले तरी विविध कारणांनी अनेकांचा घरफाळा स्वतंत्र झालेला नाही. त्यामुळे घरफाळ्यात एक मिळकत दिसत असली तरी या जादा घरांची नोंद होऊ शकते. त्यातून ही संख्या वाढलेली असू शकते.
- सुधाकर चल्लावाड, करनिर्धारक
.....

दृष्टिक्षेपात
- घर गणनेसाठी शहरात - १२०१ गट
- एका गटात १८० ते २०० मिळकती (निवासी, रहिवास, व्यावसायिक, औद्योगिक सर्व)
- एका गटाला - १ प्रगणक
- सहा गटांना १ पर्यवेक्षक
- एकूण १३२६ प्रगणक व २२१ पर्यवेक्षक
----------------------