00288
म्हाळुंगे ते परिते रस्त्याची चाळण

नंदगाव; ता. २५ : म्हाळुंगे ते परिते (ता. करवीर) दरम्यानच्या रस्त्याची अक्षरशः चाळण झाली आहे. या रस्त्यावरून दुचाकीवरून प्रवास करताना जीव मुठीत घेऊन प्रवास करावा लागतो. कारण रस्त्यांमध्ये पडलेले मोठमोठे खड्डे व खडी-मुरूम निघाल्याने खड्डे चुकवताना खडीवरून वाहन घसरून कधी अपघात होईल हे सांगता येत नाही. या रस्त्याची दुरुस्ती करावी, अशी मागणी होत आहे.
म्हाळुंगे ते परिते रस्ता कोल्हापूर-गारगोटी व कोल्हापूर-राधानगरी या दोन मुख्य रस्त्यांना जोडणारा आहे. तसेच राधानगरी तालुक्यातून गोकुळ शिरगाव व कागल औद्योगिक वसाहतीमध्ये कामाला जाणाऱ्यांची संख्याही जास्त असल्यामुळे रस्त्यावरून नेहमी वर्दळ असते. रात्रपाळी करून येताना खऱाब रस्त्यामुळे अनेकदा वाहने पंक्चरही होतात. पावसाळ्यात तर रस्त्यातील खड्ड्यांचा अंदाज न आल्यामुळे अनेक छोटे-मोठे अपघातही होतात. मध्यंतरी रस्ता मंजूर झाल्याची चर्चा होती. पण कार्यवाही काहीच नाही. हा रस्ता चांगल्या दर्जाचा करावा, अशी मागणी ग्रामस्थ व प्रवाशांकडून होत आहे.

कोट
सात -आठ वर्षापासून रस्त्यावरून कागल औद्योगिक वसाहतीत कामाला जातो. खराब रस्त्यामुळे कामावर जायला वेळ होतो. छोट्या-मोठ्या अपघातांनाही सामोरे जावे लागते. तरी लवकर रस्ता करावा.
- अमित भोपळे, प्रवासी खिंडी व्हरवडे (ता. राधानगरी)

रस्त्याची अक्षरशः चाळण झाल्याने रस्त्यावर वारंवार छोटे-मोठे अपघात होत आहेत. येणाऱ्या पावसाळ्याआधी हा रस्ता करावा.
- प्रमोद पाटील, सामाजिक कार्यकर्ते, म्हाळुंगे

साडेपाच किमीचा रस्ता पंतप्रधान ग्रामीण सडक योजनेतून होणार आहे. त्यासाठी ४.१९ कोटी रुपयांची वर्क ऑर्डर एप्रिलमध्ये मिळेल. त्यानंतर रस्ताकामाला सुरुवात होईल.
- एन. के. कांबळे, अभियंता, पंतप्रधान ग्रामीण सडक योजना, कोल्हापूर.