03356

भात जोमात; सोयाबीन कोमात
जोतिबा डोंगर परिसरातील चित्र; सततच्या पावसाचा परिणाम

सकाळ वृत्तसेवा

जोतिबा डोंगर ता. २ ः गिरोली, पोहाळे, कुशिरे, जोतिबा डोंगर, दानेवाडी, जाखले, केखले भागात यंदा पावसामुळे भात पिके जोमात आली आहेत. सततच्या पावसामुळे सोयाबीन पिके पूर्णपणे कोमात गेली असल्याचे दिसत आहे. पाठोपाठ भुईमूग, ज्वारी पिकांनाही मोठा फटका बसला आहे.
यंदा भागात सततच्या पावसाने भुईमूग सोयाबीन ज्वारी या पिकांना दणका बसत गेला. ऊन नसल्याने पिकांची वाढ चांगली झाली नाही. सोयाबीन पिकाला शेंगा भरण्याच्या काळात अधिक पाऊस झाला परिणामी पाणी साठणाऱ्या रानात तर पिके कुजली गेली . माळरानात काही ठिकाणी निचरा होणाऱ्या जमिनीत सोयाबीन पिकाने दम धरला पण काढणीच्या वेळी पुन्हा पावसाने थैमान घातले. त्यामुळे पिकांना कोंब आले . तिथेही नुकसान सोसावे लागले. भातपिके मात्र या भागात अधिक जोमाने आली आहेत . भात पिकाला यंदा पोषक वातावरण व पाऊस असल्याने ही पिके चांगली आली आहेत . गिरोली भागात भात पिकांचे प्रमाण अधिक आहे.दसरा झाल्यानंतर भाताची काढणी सुरू केली जाईल .
चौकट
भुईमूग; ज्वारीलाही फटका
भुईमूग पिकांना पावसामुळे आरा सोडताना पोषक वातावरण निर्माण झाले नाही. त्यामुळे शेंगा कमी प्रमाणात तयार झाल्या. माळरानात किरकोळ ठिकाणी भुईमूग पिकाचे प्रमाण बऱ्यापैकी आहे. ज्वारी पीकही पावसाने काळे पडली. ऐन काढणीवेळी पावसात भिजून पिकांची काढणी करावी लागली.

कोट
यंदाचा पाऊस भात पिकासाठी पोषक आहे. सोयबीन; भूईमूग पिके अधिक पावसाने गेली. दोन वर्ष पावसाचे प्रमाण कमी असल्याने भात पीक उत्पादन कमी पिकले. काहींना केवळ पिंजरावरच समाधान मानावे लागले.
यंदा भाताच्या राशी पडतील. - राहुल पाटील; शेतकरी; गिरोली