01657
‘शाहूवाडी’त भातरोप लावण्यासाठी झुंबड
तुरुकवाडी : शाहूवाडी तालुक्यात भात रोप लावण्यासाठी शेतक-यांची झुंबड उडाली आहे. तालुक्यातील रताळी लावण उरकून शेतकरी भातलावण करण्यात व्यस्त आहेत. शेतशिवार फुलून निघाले आहेत. मजुरांची टंचाई भासत असल्याने कित्येक गावात ‘पैरा’ पध्दतीने लावण उरकण्यात शेतकरी मग्न आहेत. मोटरच्या पाण्यावर करण्यात आलेले तरु लावणीयोग्य झाले आहे. पावसाचे उशिरा आगमन झाल्याने बहुतांशी शेतक-यांचे तरु लहान आहे. पावसाची उघड झाप असल्याने रोप लावणीसाठी काही शेतक-यांना इंजिन, आडव्या पाटाचे पाणी शेतात घेऊन रोप लावण करावी लागत असल्याचे चित्र आहे. रोप लावणीसाठी।जोरदार पावसाच्या प्रतीक्षेत शेतकरी आहेत. धूळवाफ पध्दतीने भात पेरा केलेली उगवण समाधानकारक झालेली नसल्याने उगवण न झालेल्या शेतात रोप लावण करण्यात येत आहे. धूळवाफ पिकांची भागलण करण्यातही शेतकरी गुंतले आहेत.