कोल्हापूर - कुत्र्याच्या गळ्यात पट्टा नजरेस पडला की ते पाळीव कुत्रे आहे असा कोल्हापुरात समज आहे. खासगी मालकीच्या कुत्र्यांच्या गळ्यातील पट्टा आता भटक्‍या कुत्र्यांच्या शेपटीजवळ लवकरच दिसणार आहे. या कुत्र्यांची हिस्टरी समजण्यासाठी त्यांच्या पायात चीप बसविली जाणार आहे.

पशसवंर्धन विभाग, महापालिका आरोग्य विभागाची यासंबंधी बैठक झाली. कुत्र्यांच्या गळ्यात बेल्ट बसविण्यासाठी पालिकेने मुंबई, पुण्यातील ठेकेदारांकडून कोटेशन मागविली होती. मात्र लॉकडाऊनमुळे कोटेशन मिळू शकलेले नाही. शहरात भटक्‍या कुत्र्यांची संख्या मोठी आहे. प्रामूख्याने कसबा बावडा येथील झूम प्रकल्पावर कचरा टाकला जातो तेथे कुत्र्यांचा उपद्रव अधिक आहे. गल्लीबोळ, उद्याने, उपनगरातील रस्त्यांवर रात्री अपरात्री कुत्री भटकत असतात. एखाद्या भागातून तक्रार आल्यानंतर महापालिकेची डॉग व्हॅन या कुत्र्याला पकडून नेते. नंतर कुत्रे आहे त्या ठिकाणी सोडले जाते. भटक्‍याची कुत्र्यांची नेमकी किती आहे हे अद्याप निश्‍चित झालेले नाही. त्यांच्या गळ्यात बेल्ट घालून हेच ते भटके कुत्रे अशी ओळख होणार आहे.

वाचा - कोरोनाग्रस्तांवर उपचार करण्यासाठी कोल्हापुरात दाखल झालंय 'हे' मशिन...

कुत्र्यांचा उपद्रव रोखण्यासाठी त्यांना रेबीजची प्रतिबंधक लस दिली जाणार आहे. प्रत्येक कुत्र्याच्या शेपटीच्या मागे चीप बसविली जाणार आहे. त्या चीपवर संबंधित कुत्र्याचा नंबर असेल. नंबर स्कॅन केल्यानंतर कुत्र्याचे लसीकरण कधी झाले. शस्त्रक्रिया कधी झाली याची माहिती मिळणार आहे.
कोल्हापुरात खासगी मालकीच्या कुत्र्यांना पट्टा घालण्याची परंपरा आहे. गळ्यात पट्टा दिसल्यानंतर ते खासगी मालकीचे आहे हे ओळखले जाते. मात्र रस्त्यावरील कुत्र्यांनाही गळ्यात पट्टा अडकविण्याचा मान मिळणार आहे.
 

कुत्र्यांच्या गळ्यात बेल्ट आणि चिप नजीकच्या काळात बसविली जाणार आहे. त्यामुळे प्रत्येक कुत्र्याची हिस्टरी समजू शकेल. पालकमंत्री सतेज पाटील यांनी बेल्ट देण्याची तयारी दाखविली आहे. सध्या लॉकडाऊनमुळे कोटेशन मिळविण्यात अडचणी आहेत. नंतर प्रत्येक कुत्र्याच्या गळ्यात बेल्ट बसेल. - विजय पाटील, पशुवैद्यकीय अधिकारी