कोल्हापूर - मौजे वाशी (ता. करवीर) येथील मंदिर परिसरात झालेल्या खून प्रकरणी दोघा सख्या भावांना न्यायालयाने दोषी ठरवले. त्या दोघांना आजन्म कारवासाची शिक्षा सुनावली आहे. महादेव मंगेश पुजारी (वय 44) व अशोक मंगेश पुजारी (दोघे रा. मौजे वाशी) अशी त्यांची नावे आहेत. सरकार पक्षातर्फे ऍड. मंजुषा पाटील यांनी काम पाहीले. 

मौजे वाशी (ता. करवीर) येथे नानासाहेब पुजारी राहतात. त्यांचे सख्खे भाऊ आण्णासाहेब आप्पाजी पुजारी (वय 47) यांच्यासह महादेव पुजारी, अशोक पुजारी ही भावकीही राहते. 11 मार्च 2018 ला गावातील बिरदेव मंदिर समोरील मोकळ्या जागेत जेवणाचा कार्यक्रम होता. समाज परंपरेनुसार कार्यक्रम झाल्यानंतर भावकितील लोकांना भांडी घासावी लागतात. जेवण झाल्यानंतर रात्री साडेआठच्या सुमारास आण्णासाहेब पुजारी हे भांडी घासण्यासाठी जात होते. त्याला महादेव व अशोक या दोघांनी विरोध केला. त्यांच्यात शाब्दीक वाद झाला. यातून त्या दोघांनी चिडून पुजारी यांचे डोके झाडाच्या पारावर जोराने अपटून मारहाण केली. यात पुजारींच्या डोक्‍याला अंतर्गत दुखापत होऊन त्यांचा मृत्यू झाला. याबाबत नानासाहेब पुजारी यांनी करवीर पोलिसात फिर्याद दिली. त्यानुसार महादेव व अशोक पुजारी या दोघा संशयितावर खूनाचा गुन्हा नोंद झाला. याचा तपास तत्कालिन सहायक पोलिस निरीक्षक पी. एस. मंडले यांनी केला. 

हे पण वाचा - हातरूमालाची मागणी करत, तोतया पोलिसाने निवृत्त शिक्षकाला घातला गंडा

या खटल्याची सुनावणी जिल्हा व सत्र न्यायाधिश (वर्ग 1) डी. के. गुडधे यांच्या न्यायालयात सुरू झाली. सरकारपक्षातर्फे ऍड. मंजुषा पाटील यांनी 11 साक्षीदार तपासले. यात फिर्यादी, सखाराम पुजारी, संजय काटकर, तीन वैद्यकीय अधिकारी यांची साक्ष महत्वाची ठरली. न्यायालयाने दोन्ही बाजूच्या युक्तीवादानंतर महादेव व अशोक पुजारी या दोघांना दोषी ठरवले. त्या दोघांना आजन्म कारावासाची शिक्षा आणि पाच हजार रूपये दंडाची शिक्षा सुनावली. सरकारपक्षाला या कामात करवीरचे पोलिस हवालदार महेश वाडकर व एम. एम. नाईक यांचे सहकार्य मिळाले. 

हे पण वाचा - बापरे! चक्क पोलीसाच्या घरात आढळला दारु साठा
 

संपादन - धनाजी सुर्वे