हुपरी : भोर तालुक्यातील रायरेश्वर किल्ल्यावर (Raireshwar Fort) गडकोट मोहिमेदरम्यान (Gadkot Mohim) एक तरुण पाय घसरून दरीत कोसळला. तरुण सागर पांडुरंग वाईंगडे (वय २५, रा. हुपरी, ता. हातकणंगले, जि. कोल्हापूर) असे मृत्यू झालेल्या तरुणाचे नाव असून, गुरुवारी (ता. २५) सकाळी ९ वाजण्याच्या सुमारास ही दुर्घटना घडली.

येथील दहा-बारा तरुण गडकोट मोहिमेसाठी रायरेश्वरावर बुधवारी मुक्कामी गेले. गुरुवारी सकाळी ९ वाजता ते प्रतापकडाकडे जायला निघाले. त्यावेळी पायवाटेने जाताना सागर पाय घसरून दरीत कोसळला. त्याच्यासोबत असलेल्या मित्रांनी त्याचा शोध घेतला. पाऊण तासानंतर तो दरीत जखमी अवस्थेत आढळला.

मात्र, त्याला दरीतून बाहेर आणण्यासाठी त्यांना रस्ता सापडला नाही. त्यामुळे ते दरीत फिरत राहिले. दुपारी दोनच्या सुमारास भोरच्या सह्याद्री सर्च अँड रेस्क्यू टीम भोरच्या जवानांनी दरीत शोध घेऊन त्यास उपचारासाठी भोरच्या उपजिल्हा रुग्णालयात दाखल केले. तेव्हा डॉक्टरांनी त्यास मृत घोषित केले. रोहन गोंधळी यांनी पोलिसांना खबर दिली, अशी माहिती भोर पोलिसांनी दिली.

अखेरचा सेल्फी...

सागर पाच-सहा वर्षांपासून धारातीर्थयात्रेसाठी जात असे. तो अविवाहित होता. तो त्याच्या मामाकडे चांदी काम करत होता. येथून रवाना होण्यापूर्वी त्याने आपल्या मित्रांसमवेत एक सेल्फी घेतला होता. त्यांनतर मोहिमेदरम्यान त्याने घेतलेला सेल्फी अखेरचा ठरला.