मरवडे - हुलजंती (ता.मंगळवेढा) येथे धनगर समाजाचे आराध्य दैवत हुलजंतीचा महालिंगराया व  हुन्नूरचा बिरोबा या गुरू-शिष्यासह अन्य देवतांच्या भेटीचा सोहळा लाखो भाविकांच्या साक्षीने अभूतपूर्व भक्तिमय वातावरणात पार पडला. भेट सोहळ्यावेळी आसमंतात भंडारा,खोबरे व लोकर उधळण्यात आल्याने सारा परिसर भंडाऱ्याने न्हाऊन निघाला होता.

रविवारी (ता.२७) रोजी मध्यरात्री मुंडास बांधण्याचा सोहळा पार पडल्यानंतर आज दुपारी चारच्या सुमारास महालिंगराया मंदिरालगतच्या ओढ्यात महालिंगराया -बिरोबा या गुरुशिष्यासह सात दैवताच्या पालखी भेटीचा सोहळा रंगला. 

महालिंगराया यांच्या पालखीस शिरडोनचा बिरोबा-शिलवंती, बिज्जरगीचा बाळाप्पा, जिरअंकलगीचा बिरोबा, सोन्याळचा पांडुरंग-विठ्ठल यांनी भेट दिल्यानंतर महालिंगराया व बिरोबा या गुरुशिष्यांची पालखी भेट झाली. नगारा व ढोल  वाजवीत प्रत्येक पालखी महालिंगराया पालखीस भेट देत असताना 'महालिंगराया-बिरोबाच्या नावानं चांगभलं' च्या गजरात आकाशात भंडारा,लोकर व खोबरे उधळण्यात येत होती. नगारा व ढोल यांच्या आवाजाने संपूर्ण परिसर दणाणून गेला होता. हा पालखी भेट सोहळा महाराष्ट्र, कर्नाटक, आंध्रप्रदेश, तामिळनाडू व गोवा राज्यातून दाखल झालेल्या सुमारे दोन लाखाहून भाविकांनी 'याचि देही,याचि डोळां' अनुभवला.

महालिंगराया व  बिरोबा या गुरू-शिष्यासह अन्य देवतांच्या भेट सोहळ्यानंतर मंदिर परिसरात भाकणूक वर्तविण्यात आली. सोलापूरच्या सिद्धरामेश्वर यांच्या यात्रेतील भाकणूकीप्रमाणेच हुलजंती येथील भाकणूकीस महत्व आहे. यावेळी ज्वारी,गहू, व हरभरा ही पिके चांगली येतील, तुरी-मटकी उत्पादन कमी होईल, येत्या पौर्णिमेपर्यंत वातावरण बदलामुळे संकट येईल, मृग व रोहिणी या नक्षत्रे चांगली जातील, बैलाचे शिंग सोन्याचे होईल असे सांगत जनावरांना चांगले दिवस येतील, ज्वारी व कडबा यांचे उत्पादन बंदा रुपया होईल अशी भाकणूक केली.

भेट सोहळ्यास आमदार भारत भालके, दामाजी साखर कारखान्याचे अध्यक्ष समाधान अवताडे, सभापती प्रदीप खांडेकर, जिल्हा परिषदेच्या सदस्या शिला शिवशरण, पंचायत समिती सदस्य प्रेरणा मासाळ, सरपंच भाग्यश्री मासाळ यांनी हजेरी लावली. भेटीच्या सोहळ्यासाठी आलेल्या भाविकांची कोणत्याही प्रकारे गैरसोय होवू नये यासाठी मंदिर समिती व ग्रामपंचायतीच्यावतीने व्यवस्था करण्यात आली होती.

दानशूराकडून लाखो भाविकांना अन्नदान
कर्नाटक राज्यातील बागलकोट जिल्ह्यातील बंदीगणी येथील दासोहरण चक्रवर्ती अन्नदानेश्वर महाराज यांच्याकडून हुलजंती येथे महालिंगराया-बिरोबा या भेट सोहळ्यासाठी आलेल्या लाखो भाविकांना अन्नदान करण्यात आले. या अन्नदानासाठी सुमारे सहाशे सेवेकरी कोणताही मोबदला न घेता दिवसरात्र परिश्रम घेतात.