बेळगाव - कळसा-भांडूरा (म्हादाई) योजनेचा निकाल सर्वोच्च न्यायालयात राज्याच्या बाजूने लागल्यानंतर काम सुरु केले जाईल, अशी माहिती पाठबंधारे मंत्री गोविंद कारजोळ यांनी आज (ता.६) पत्रकार परिषदेत दिली. कळसा भांडूरा योजना सध्या न्यायप्रविष्ठ आहे. दावा सर्वोच्च न्यायालयात आहे. निकाल हाती आल्यानंतर पहिल्यांदा भागाशः विकास कामे सुरु केली जातील. पण, सध्या काम हाती घेणे शक्य नाही. परंतु, निकाल हाती मिळताच दुसऱ्या दिवसांपासून काम सुरु करण्याची तयारी राज्याची आहे. राज्य सरकारने ५ टीएमसी पाणी पिण्यासाठी आणि उर्वरित पाणी विद्युत उत्पादनासाठी राखीव ठेवण्याचा प्रस्ताव असल्याचे कारजोळ यांनी स्पष्ट केले.

कारजोळ पुढे म्हणाले,‘‘कळसा भांडूरा योजनेसाठी पर्यावरण प्रदूषण नियंत्रण मंडळाकडून २०१५ मध्ये ना हरकत प्रमाणपत्र मिळाले आहे. पण, या संदर्भात गोवा आणि महाराष्ट्र सरकारकडून हरकत दाखल करण्यात आली आहे. म्हादाईचे काम सुरु करण्यास राज्य सरकारला स्वारस्य आहे. पण, सदर विषय न्यायालयात असल्यामुळे काम करणे शक्य नाही. राज्याच्या बाजूने निकाल मिळाल्यानंतर तातडीने काम सुरू करू.’’

कुमारस्वामी टीका करणे थांबवावे

देशाच्या एकतेसाठी राष्ट्रीय स्वयंसेवक संघ काम करते. आरएसएस वर टीका आणि त्याला वेगळा रंग देणे माजी मुख्यमंत्री एच. डी. कुमारस्वामी व सिध्दरामय्या यांनी थांबवावे. तथ्यहिन आरोप करून जनतेची दिशाभूल करु नये, अशी मागणी केली. दसरा व कित्तूर उत्सवाच्या धर्तीवर यंदा कित्तूर उत्सव तीन दिवस चालेल, अशी माहिती पालकमंत्री गोविंद कारजोळ यांनी दिली.