अहमदनगर : 'आगामी विधानसभा निवडणुकीत राष्ट्रवादी व काँग्रेसचे सरकार येईल. आणि जरी दुसरे कोणाचे सरकार सत्तेत आले, तरी आमच्या पक्षातून तिकडे गेलेल्यांपैकी बरेच आमदार राज्य मंत्रिमंडळात मंत्री असतील,' असे मत खासदार सुप्रिया सुळे यांनी पत्रकारांशी बोलताना व्यक्त केले.

काही दिवसांवर येऊन ठेपलेल्या विधानसभा निवडणुकीनिमित्त राष्ट्रवादी काँग्रेसच्या शिवस्वराज्य यात्रेला राज्यभरात चांगला प्रतिसाद मिळत आहे. खासदार सुप्रिया सुळेही पुढील पंधरा दिवस महाराष्‍ट्रातील विविध 15 शहरातील लोकांशी संवाद साधणार आहेत. शुक्रवारी (ता.23) त्या नगरमध्ये आल्या होत्या. त्यांनी व्यापारी तसेच कार्यकर्त्यांशी संवाद साधून त्यांची मते जाणून घेतली. 

पत्रकारांशी बोलताना खासदार सुळे म्हणाल्या, आमचे सरकार सत्तेत असताना वैयक्तिक कटुता नव्हती. मात्र, आता वैयक्तिक कटुता घेऊन कारवाईचा बडगा दाखवला जात आहे. सध्या सर्वसामान्यांचे अनेक प्रश्न प्रलंबित आहेत. नोटाबंदी नंतरही भ्रष्टाचार कमी झालेला नाही, हे त्यांच्याच मंत्र्यांनी केलेली वक्तव्ये आहेत. कारवाईच्या नावाखाली नेत्यांचा आवाज दाबला जात आहे. ईव्हीएमबाबत लोकांमध्ये नाराजी आहे. नवीन तंत्रज्ञानाला माझा विरोध नाही, परंतु लोकांचेही मत जाणून घेतले पाहिजे. आपण मत कोणाला दिले आणि ते कोणाला मिळाले, याची खातरजमा करण्याचा अधिकार मतदारांना असलाच पाहिजे.