इस्लामपूर - नगराध्यक्ष शहराचा मालक नसून जनतेचा सेवक आहे. त्याने कोणतेही राजकारण न करता जनतेची विकासकामे करायला हवीत, या शब्दात उच्च न्यायालयातील दोन न्यायाधीशांच्या खंडपीठाने इस्लामपूर नगराध्यक्षांना खडे बोल सुनावले. इस्लामपूर नगरपालिकेच्या १८३ वर्षाच्या इतिहासात प्रथमच नगराध्यक्षांच्या मनमानी कारभाराने नगरपालिकेवर नामुष्की ओढवल्याची टीका राष्ट्रवादीचे शहराध्यक्ष, नगरसेवक शहाजी पाटील यांनी पत्रकार परिषदेत केली. 

आम्ही विरोधी नगरसेवकांनी ५७ विषयाची सूची असलेली विशेष सभा घेण्याची मागणी नगराध्यक्ष व जिल्हाधिकारी यांच्याकडे केली होती. ती दोघांनीही बेकायदेशीरपणे फेटाळल्याने आम्ही उच्च न्यायालयात धाव घेतली होती. न्यायाधीशांनी दोघांवरही कडक शब्दात ताशेरे ओढल्याने जिल्हाधिकारी यांनी १५ दिवसात विशेष सभा घेण्याची लेखी हमी दिली असल्याचेही त्यांनी सांगितले.   

राष्ट्रवादी काँग्रेस व अपक्ष आघाडीने उच्च न्यायालयात दाखल केलेल्या याचिकेच्या निकालाची माहिती राष्ट्रवादी नगरसेवक, पदाधिकाऱ्यांनी दिली.

माजी नगराध्यक्ष विजयभाऊ पाटील, बी. ए. पाटील, युवक राष्ट्रवादीचे शहराध्यक्ष,नगरसेवक खंडेराव जाधव, आनंदराव मलगुंडे, संग्राम पाटील, बशीर मुल्ला, सुनीता सपकाळ, जयश्री पाटील, संगीता कांबळे, सदानंद पाटील उपस्थित होते.