सोलापूर : जिल्हा परिषदेच्या आरोग्य विभागाकडे ना हरकत दाखला घेण्यासाठी अनेक प्रस्ताव येतात. त्यासाठी शुल्क आकारले जाते. त्यात वाढ करण्याचा निर्णय आज झालेल्या जिल्हा परिषदेच्या आरोग्य समिती बैठकीत घेण्यात आला आहे. त्यामुळे बिअरबारच्या ना हरकत दाखल्यासाठी आता पाच हजारांऐवजी 25 हजार रुपये मोजावे लागणार आहेत. 

आरोग्य समितीत निर्णय झाल्यानंतर त्याबाबतचा प्रस्ताव जिल्हा परिषदेच्या सर्वसाधारण सभेकडे पाठविण्यात येणार आहे. आजच्या बैठकीत 10 प्रकारच्या ना हरकत दाखल्यांसाठीच्या शुल्कात वाढ करण्याचा निर्णय घेतला आहे. पेट्रोल पंप, खडीक्रशर, खासगी दवाखाना, सिनेमागृहासाठी पाच हजारांवरून 10 हजार, कत्तलखान्यासाठी पाच हजारांवरून 25 हजार, बिअरशॉपी एक हजारांवरून 10 हजार, मिनरल वॉटर प्लॉट एक हजारांवरून पाच हजार, कारखान्यासाठी दोन हजारांवरून पाच हजार, सिमेंट फॅक्‍ट्रीसाठी 25 हजारांवरून 50 हजार रुपयांचे शुल्क आकारले जाईल. शेतीपूरक व्यवसाय, छोटे दुकानदार, शैक्षणिक प्रयोजन व सामान्य नागरिकांच्या हिताच्या ना हरकत दाखल्यासाठी कोणत्याही प्रकारची वाढ न करण्याचा निर्णयही घेण्यात आला. सभापती शिवानंद पाटील यांच्या अध्यक्षतेखाली झालेल्या बैठकीला अरुण तोडकर, स्वाती कांबळे, अतुल खरात, अण्णाराव बाराचारे, प्रभावती पाटील उपस्थित होते. 

जिल्ह्यात जानेवारीपासून आतापर्यंत डेंगीचे 76 रुग्ण आढळले आहेत. डेंगीबाबत तालुकास्तरीय कार्यशाळा झाल्या. प्राथमिक आरोग्य केंद्रातील वर्ग तीन व चारच्या कर्मचाऱ्यांसाठी बायोमेट्रिक हजेरी बसविण्याचा निर्णय झाला. 
शिवानंद पाटील, सभापती, आरोग्य समिती.