कसबा तारळे - येथे वारकरी संप्रदायाच्यावतीने ज्ञानेश्वरी पारायण सोहळ्याचे आयोजन केले होते. आज अश्व रिंगण सोहळ्याने सोहळ्याची सांगता झाली. येथील ज्ञानेश्वर मंदिरात झालेल्या ज्ञानेश्वरी ग्रंथ पारायण व 'राम कृष्ण हरी' नामजप सोहळ्यात शेकडो भाविक सहभागी झाले होते. 

येथील ज्ञानेश्वर मंदिराचे संकल्पक कै . बळवंत भोजने- महाराज यांच्या प्रेरणेने व कीर्तनकार वसंत साबळे - महाराज यांच्या मार्गदर्शनाखाली येथे पारायण सोहळ्याचे आयोजन केले होते. सदाशिव पाटील - महाराज यांनी व्यासपीठ चालक म्हणून काम पाहिले. सप्ताह काळात वसंत साबळे, सदाशिव पाटील, सचिन संकपाळ (आळते ), पांडुरंग उपलाने (अवचितवाडी), बाळासाहेब पाटील (पुंगाव), पूर्णानंद काजवे (कोगनोळी), भानुदास महाराज आणि आनंदा माधव (आळंदी) आदींची प्रवचने व कीर्तने झाली. याशिवाय अनंत तेली, दत्त मंदिर व गजानन महाराज मंदिर भजनी मंडळ आणि सुतार बंधू यांचे भजनाचे कार्यक्रम झाले.

वसंत साबळे यांचे काल्याचे कीर्तन झाले. सुनील वणकुद्रे, अंकुश एकावडे, शांताराम सुतार, शामराव व सुरेश गुरव आणि गुंडू ननवरे आदींनी अनुक्रमे चोपदार ,मृदंग वादक, शिंग वादक, नगारा वादक म्हणून सेवा दिली.

आज दुपारी गावातून टाळ- मृदंगाच्या गजरात  दिंडी व नगर प्रदक्षिणा  झाली. यावेळी शिवाजी पेठ व पाटील गल्ली येथे अश्वाचे उभे रिंगण व प्राथमिक शाळेच्या पटांगणात गोल रिंगण उत्साहात झाले. या रिंगण सोहळ्याने सप्ताहाची सांगता झाली.