सांगली - शेतकरी मित्रांनो गेल्या पंधरा दिवसांपासून अातुरतेने वाट पाहणाऱ्या ॲग्रोवन प्रदर्शनाला आज (ता. ५) सुरवात होत आहे. नेमिनाथनगर येथील कल्पद्रूम क्रीडांगणावर तीन दिवस चालणाऱ्या या प्रदर्शनाचे सकाळी अकरा वाजता उद्‌घाटन होईल. इथं नवनवीन तंत्रज्ञान, खते, अवजारांसह सर्व काही एकाच छताखाली अनुभवता येईल. विशेष म्हणजे तज्ज्ञांचे मार्गदर्शन खास पर्वणी असेल. 

नेचर केअर फर्टीलायझर्स प्रस्तुत ॲग्रोवन कृषी प्रदर्शनाचे ‘बी. जी. चितळे’ आणि ‘चितळे जिनस एबीएस इंडिया’  सहप्रायोजक आहेत. महाराष्ट्राच्या कृषी क्षेत्रात क्रांतिकारी बदल घडवणाऱ्या ‘ॲग्रोवन’ने सतत नावीन्याचा ध्यास धरताना शेतकऱ्यांना सतत एक पाऊल पुढे ठेवण्याचा प्रयत्न केला आहे. त्याचाच एक भाग म्हणून कृषी प्रदर्शनाचे आयोजन केले जाते. 

यंदाच्या प्रदर्शनात राज्यभरातील शेती क्षेत्रातील तंत्रज्ञान, माहितीची देवाण-घेवाण हे खास वैशिष्ट्य आहे. यासह अत्याधुनिक तंत्रज्ञानाची माहितीही उपलब्ध होईल. विविध नामवंत कंपन्यांचे स्टॉल्स्‌ही इथे मांडण्यात आले आहेत. त्यात प्रामुख्याने नवनवीन तंत्रज्ञान, खते, औषधे, अवजारे, यंत्रसामग्रीचे विविध प्रकार पहायला मिळतील. त्याचे वैशिष्ट्यही प्रात्यक्षिकासह इथे पहायला मिळेल.

ट्रॅक्‍टर्स, हार्वेस्टिंग यंत्रे, विविध प्रकारची अवजारे,  कापणी यंत्रे, जैविक कीटकनाशके, विद्राव्य खते, ग्रीन हाऊस टेक्‍नॉलॉजी 
आणि इप्लिमेंटस्‌, बियाणे उत्पादक, टिश्‍यू कल्चर, ठिबक व तुषार सिंचन, पॅकेजिंग आणि कोल्ड स्टोअरेज उद्योजक, ग्रेडिंग, वेइंग, सॉर्टिंग  अवजारे उत्पादक कंपन्या, बॅंका व कृषी शिक्षण संस्था, कृषी साहित्य प्रकाशन, कृषी संशोधन संस्था व शासनाचे विविध विभागही प्रदर्शनात सहभागी असतील.
विशेष म्हणजे द्राक्ष, डाळिंब, ऊस, केळी, हळद या नगदी पिकांच्या लागवडीविषयी तज्ज्ञांचे मार्गदर्शनही मिळणार आहे. द्राक्ष, डाळिंब निर्यातीबाबतही खास मागर्दर्शनाची पर्वणी असेल. सांगली, सोलापूर, कर्नाटकचा सीमाभाग, कोल्हापूर, सातारा जिल्ह्यांतील शेतकऱ्यांनी लाभ घ्यावा, असे आवाहन करण्यात आले आहे.