सांगली - पोलिसांच्या अमानवी कृतीचा निषेध करायला सबंध महाराष्ट्रातील सर्वपक्षीय नेत्यांची सांगलीत रीघ लागली आहे. अतिशय संवेदनशील प्रकरणात पोलिस दलाची नाचक्की झाली आहे. महाराष्ट्र ढवळून निघाला आहे. अशावेळी पालकमंत्री सुभाष देशमुख मात्र सांगलीकडे फिरकलेले नाहीत. एका संवेदनशील प्रश्‍नावर त्यांनी असंवेदनशीलपणे पाहिले आहे. 

चोरीच्या गुन्ह्यात अटक केलेल्या अनिकेत कोथळे याचा कोठडीत मारहाण करून खून करण्यात आला. त्याचा मृतदेह आंबोलीत नेऊन जाळला गेला. तो फरार झाल्याचा बनाव करण्यात आला. या प्रकरणाला आठवडा उलटायला आला. तब्बल १२ पोलिस निलंबित झाले. पोलिस उपाधीक्षकांना सहआरोपी करण्याची मागणी केली जातेय. गृहराज्यमंत्री दीपक केसरकर यांनी पोलिस अधीक्षक आणि विशेष पोलिस महानिरीक्षकांचीही  चौकशी केली जाईल, असे जाहीर केले आहे.

या संवेदनशील आणि राज्य हादरवून सोडणाऱ्या प्रकरणात गृहराज्यमंत्री दीपक केसरकर, कृषी राज्यमंत्री सदाभाऊ खोत, माजी मुख्यमंत्री पृथ्वीराज चव्हाण, विरोधी पक्षनेते राधाकृष्ण विखे-पाटील, राष्ट्रवादीचे गटनेते जयंत पाटील, आमदार पतंगराव कदम, मनसेचे नेते बाळा नांदगावकर, भूमाता ब्रिगेडच्या तृप्ती देसाई यांनी येथे भेट दिली. सदाभाऊ खोत वगळता सर्वांनी कोथळे कुटुंबीयांची भेट घेतली. यात गृहखात्यावर टीकेचा भडिमार सुरू आहे. खुद्द मुख्यमंत्री देवेंद्र फडणवीस यांच्याकडेच  गृहखात्याची जबाबदारी आहे. त्यामुळे हा विषय  अधिकच संवेदनशील आहे. 

या घडामोडी सुरू असताना सहकारमंत्री सुभाष देशमुख सांगलीकडे फिरकलेले नाहीत, हे आश्‍चर्यजनकच आहे. त्यांनी पालकमंत्रिपदाची धुरा सांभाळून दीड वर्ष झाले. या काळात त्यांनी जिल्हा प्रशासनावर फारशी पकड घेतली नाही, हे वास्तव आहे. जिल्हा पोलिस, जिल्हा  प्रशासनाला त्यांचा धाक वाटत नाही, हेही अनेक  प्रकरणांत स्पष्ट दिसले आहे. कारण, देशमुख यांना सांगलीसाठी वेळ कुठाय? जी अवस्था महसूलमंत्री चंद्रकांत पाटील पालकमंत्री असताना होती, त्याहून वेगळे चित्र नाही. ‘तुम्ही महापालिकेच्या प्रश्‍नात लक्ष का घालत नाही?’ या प्रश्‍नावर त्यांनी ‘मला महापौरांनी बोलावलेच नाही’, असे उत्तर दिले होते. आता या प्रकरणात त्यांनी कुणी आमंत्रण देण्याची गरज आहे का, असा प्रश्‍न उपस्थित केला जात आहे. 

कर्जमाफीचे कारण
पालकमंत्री सुभाष देशमुख सांगलीला का आले नाहीत? याचा शोध घेताना अत्यंत तकलादू कारणे समोर आली आहे. एक तर सोलापूर विद्यापीठाच्या नामांतराच्या प्रश्‍नात ते अडकलेले आहेत. दुसऱ्या बाजूला सोलापूरचे पालकमंत्री विजयकुमार देशमुख यांच्यासोबतच्या राजकीय काटाकाटीतून त्यांना वेळ नाही. त्यांनी अधिकृत कारण देताना ‘कर्जमाफीत अडकलोय’,अशी ढाल केली आहे. कर्जमाफीचे त्रांगडे सुटायला किती काळ लागेल, पत्ता नाही. तोवर ते इकडे फिरकणारच नाहीत का? सांगलीचे वाटोळे झाले, राज्यभर नाचक्की झाली, एकाचा हकनाक बळी गेला तरी पालकमंत्र्यांना वेळ नाही, हेच धक्कादायक आहे.