सांगली : विट्याचे माजी नगराध्यक्ष वैभव पाटील, तसेच सांगलीचे माजी नगरसेवक पद्माकर जगदाळे यांनी राष्ट्रवादीचे नेते उपमुख्यमंत्री अजित पवार (Ajit Pawar) यांच्या मुंबईत झालेल्या बैठकीत उपस्थिती लावून आपण त्यांच्या गटात असल्याचे संकेत दिले आहेत.

याबरोबरच माजी महापौर दिग्विजय सूर्यवंशी, योगेंद्र थोरात यांचीही उपस्थिती होती. यावेळी 'तुम्ही एकसंध राहा, मी सांगलीच्या विकासाचे प्रश्न मार्गी लावतो' असे आश्वासन अजित पवार यांनी दिल्याचे समजते. तसेच लवकरच विट्यातून अजित पवारांचा सांगली दौरा होणार असल्याचेही समजते.

राष्ट्रवादीचे प्रदेशाध्यक्ष जयंत पाटील यांनी आपण शरद पवार यांच्या सोबतच राहणार असल्याचे स्पष्ट केले आहे. त्यामुळे जिल्ह्यात शरद पवार गट भक्कम राहील, असा अंदाज वर्तवण्यात येत होता. मात्र, काल मुंबईत झालेल्या अजित पवार यांच्या बैठकीत माजी नगरसेवक योगेंद्र थोरात, इद्रिस नायकवडी, पद्माकर जगदाळे, विट्याचे माजी नगराध्यक्ष वैभव पाटील यांच्यासह जिल्ह्यातील ग्रामीण भागातील कार्यकर्त्यांनी उपस्थिती लावली.

बैठकीत वैभव पाटील, पद्माकर जगदाळे, योगेंद्र थोरात यांनी आपली मते अजित पवारांसमोर मांडली. उपमुख्यमंत्री अजित पवार यांनी यावेळी 'तुम्ही सर्व एकसंध राहा, सांगलीची विकास कामे, प्रकल्पांचे प्रस्ताव माझ्याकडे द्या, मी संबंधित विभागांशी चर्चा करून ते मार्गी लावतो, असे आश्वासन दिल्याचे समजते. बैठकीस तासगाव, कवठेमहांकाळ, विटा, वाळवा तालुक्यांतील अनेकजण उपस्थित होते, असे समजते. यावेळी प्रदेशाध्यक्ष सुनील तटकरेही उपस्थित होते.

महापौरपदाची मुदत संपताच सूर्यवंशींची उडी!

दिग्विजय सूर्यवंशी यांनी आपण जयंत पाटील आणि शरद पवार यांच्यासोबत असल्याचे महापौर असताना स्पष्ट केले होते. मात्र, मुदत संपल्यानंतर दोनच दिवसांत त्यांनी अजित पवार गटाच्या बैठकीला उपस्थिती लावून जयंत पाटील यांचे साथ सोडल्याचे संकेत दिले आहेत. माजी महापौर दिग्विजय सूर्यवंशी अजित पवारांसोबत गेल्याने ते आता राष्ट्रवादीचे आणखी नगरसेवक अजित पवार गटात येण्यासाठी पुढाकार घेण्याची शक्यता आहे. त्यासाठी लवकरच अजित पवार बैठक घेतील, अशी चर्चा आहे.