सांगली : शहर आणि उपनगर परिसरात दुचाकी चोरट्यांनी धुमाकूळ घातला आहे. दररोज सरासरी दोन दुचाकी शहर परिसरातून चोरीस जाऊ लागल्या आहेत. चोरट्यांनी शहर, विश्रामबाग, संजयनगर पोलिसांसह स्थानिक गुन्हे अन्वेषणच्या पथकासमोर आव्हान उभे आहे.घरासमोर लावलेली दुचाकी रात्रीतून गायब करण्याचे प्रकार गेल्या वर्षभरापासून वाढलेले आहेत. शहर व उपनगरांतील दुचाकी चोरींचे प्रमाण पाहिले तर रोज सरासरी दोन दुचाकी चोरीला जातात.

घरासमोरून; तसेच बाजारात लावलेल्या दुचाकी सहजपणे चोरीला जात असल्यामुळे पोलिसांची डोकेदुखी वाढली आहे. सध्या दुचाकीच्या किमती लाखापर्यंत पोहोचल्या आहेत. अशावेळी पहिली दुचाकी चोरीस गेल्यानंतर दुसरी दुचाकी घेणे सहज आणि सोपे राहिले नाही. तसेच चोरीस गेलेल्या दुचाकीचा विमा नसेल तर भरपाई मिळणे देखील मुश्‍किल बनते.

गेल्या वर्षभरापासून दुचाकी चोरींचे वाढते प्रमाण पाहिले तर या चोरीच्या दुचाकी जातात कोठे, असा प्रश्‍न निर्माण होतो. वाहनांचे सुटे भाग करून ती विक्री करणारी यंत्रणा कार्यरत असली पाहिजे. शहरातील काही भंगार व्यावसायिक अशा प्रकारच्या चोरीच्या दुचाकी स्क्रॅपमध्ये काढण्यात गुंतल्याची शक्यता आहे. दुचाकी चोरांच्या एक, दोन नव्हे तर जास्त टोळ्या असल्याची शक्यता आहे.

शहर, विश्रामबाग, संजयनगर पोलिसांनी; तसेच स्थानिक गुन्हे अन्वेषणच्या पथकाने दुचाकी चोरीचे काही गुन्हे उघडकीस आणले आहेत. परंतु चोरीस जाणाऱ्या दुचाकी आणि गुन्हे उघडकीस येण्याचे प्रमाण पाहिले तर त्यात मोठी तफावत आहे. ती कमी करण्याची गरज आहे. त्याचबरोबर दुचाकीच्या मालकांनी सध्या टायर लॉक, साखळी लॉक अशा एकापेक्षा जास्त पर्यायाचा वापर करण्याची आवश्‍यकता आहे.

एका दिवसात चार दुचाकी गेल्या

शहर, विश्रामबाग आणि संजयनगर पोलिस ठाणे हद्दीत चार दुचाकी चोरीस गेल्याचे गुन्हे रविवारी दाखल झाले. त्यामुळे आता पोलिसांनी आणखी दक्ष होण्याची गरज आहे.