बेळगाव : मच्छे येथील नेहरूनगर परिसरात श्रीनिवास फॅक्टरीशेजारी वास्तव्यास असणाऱ्या १३ वर्षीय मुलीचा हेस्कॉमच्या (Hescom Electricity) गलथान कारभारामुळे हाकनाक बळी गेला. मधुरा केशव मोरे असे मुलीचे (School Girl) नाव आहे.

सोमवारी (ता. २२) ही घटना घडली असून, मुलगी मित्रमैत्रिणींसमवेत खेळताना हा प्रकार घडला. नेहरुनगर येथील कृष्णा बोंगाळे यांच्या घरासमोरून हेस्कॉमची उच्च दाबाची (हाय व्होल्टेज केबल) तार गेली आहे.

यापूर्वीही बोंगाळे कुटुंबीयातील सदस्याला अशाच पद्धतीने विजेचा झटका लागला होता. ही तार खासगी जागेतून गेली असून, ती हटविण्यासाठी लोकप्रतिनिधी आणि हेस्कॉम अधिकाऱ्यांकडे अनेकवेळा तक्रार केली आहे, मात्र हेस्कॉम अधिकाऱ्यांच्या दुर्लक्षामुळे अद्याप ही तार हटविली नाही. मूळ येळ्ळूर, राजहंसगड येथे राहणारी आणि सध्या वडिलांच्या कामानिमित्त कोल्हापूर येथे स्थायिक असणारी मधुरा ही आपल्या आजोळी सुटीचा आनंद घेण्यासाठी आली होती.

खेळता खेळता मधुराचा हात उच्च दाबाच्या तारेला लागला आणि पाहताक्षणीच ती उडून दुसऱ्या मजल्यावर पडली. दोन वर्षांपासून सातत्याने हेस्कॉमकडे याबाबत तक्रार करूनही अधिकाऱ्यांच्या अक्षम्य दुर्लक्षमुळे आज मुलीला जीव गमावावा लागला. याप्रकरणी सायंकाळी उशिरापर्यंत बेळगाव ग्रामीण पोलिसांत गुन्हा दाखल करण्याच्या हालचाली सुरू होत्या.

सहा दिवसांत दोन घटना

भाजी विक्रेत्या महिलेचा विजेच्या धक्यात मृत्यू झाल्याची घटना १७ मे रोजी घडली होती. ७६ वर्षीय वृध्दा भाजीविक्री करून घरी परतण्याच्या तयारीत असताना विद्युत तारेच्या स्पर्शाने त्या अत्यवस्थ झाल्या. वैद्यकीय उपचारासाठी घेऊन जात असताना वाटेत मृत्यू झाला. यानंतर आज मच्छेत हेस्कॉमच्या गलथानपणामुळे मुलीचा बळी गेला आहे.