शिराळा - शिराळा विधानसभा मतदारसंघातून सम्राट महाडिक यांनी उमेदवारी जाहीर केली आहे. भाजपकडे उमेदवारीची मागणी केल्याचे त्यांनी जाहीर केले आहे. त्यामुळे शिराळा मतदारसंघात प्रथमच भाजपमध्ये शिवाजीराव नाईक व सम्राट महाडिक यांच्यात उमेदवारीसाठी रस्सीखेच होणार आहे. भाजपमध्ये अनेकांचे स्वागत केले जात आहे. महाडिक यांना भाजप आपल्या तंबूत घेणार का? त्यांच्या पाठीशी अदृश्‍य शक्ती कोणाची आहे? भाजप नेते कोणता पवित्रा घेणार? याबद्दल उत्सुकता आहे. महाडिक यांनी उमेदवारी न मिळाल्यास अपक्ष लढण्याचा निर्णय जाहीर करून चेंडू भाजपच्या कोर्टात सरकवला आहे.

शिराळा मतदारसंघात आमदार शिवाजीराव नाईक, राष्ट्रवादीचे माजी आमदार मानसिंगराव नाईक, काँग्रेसचे सत्यजित देशमुख यांचे तीन सक्रिय गट आहेत. येथील राजकारण या तीन गटांभोवती फिरत राहते. हे सर्वज्ञात आहे. वाळव्यातून राष्ट्रवादीचे प्रदेशाध्यक्ष जयंत पाटील व नानासाहेब महाडिक कुटुंबीय यांची साथ कोणाकोणाला मिळत असे. आत्ता सम्राट महाडिक यांनी ‘वेळोवेळी आम्ही भाजपला मदत केली. त्याचा फायदा त्यांना झाला. यावेळी विधानसभेची उमेदवारी मलाच द्यावी’ अशी  मागणी रेटली आहे. आमचे सर्वतोपरी प्रयत्न सुरू असल्याचे सांगून अदृश्‍य शक्ती पूर्ण ताकदीने झटणार आहे, असेही जाहीर केले आहे.

यापूर्वी शिराळा मतदारसंघातून प्रत्येक पक्षाचा एकच उमेदवार असे. काँग्रेसमधून सत्यजित देशमुख, राष्ट्रवादीतून मानसिंगराव नाईक, भाजपमधून आमदार शिवाजीराव नाईक हे उमेदवार असतील असे सध्याचे  चित्र आहे. नव्हे तर अशीच लढत होईल, असा अंदाज आहे. त्यात सम्राट महाडिक यांनी भाजपकडे उमेदवारी मागितल्याने नाईक व महाडिक गटांत चढाओढ राहणार आहे.

नाईक यांच्या रूपाने भाजपला २०१४ मध्ये भाजपला सक्षम उमेदवार मिळाला. त्यामुळे भाजपचे मतदार संघात चांगले अस्तित्व निर्माण झाले. त्यांना मंत्रिपद मिळाले नसले तरी त्यांनी चांगला निधी आणला. आपणाला भाजपची उमेदवारी पुन्हा मिळावी असा त्यांनी प्रयत्न  सुरू केला आहे. त्यांची भूमिका काय राहणार याकडे मतदारसंघाच्या नजरा आहेत. आजपर्यंत साथ देणारे आता हक्क मागू लागल्याने चांगलीच रंगत भरणार हे  निश्‍चित आहे.