सोलापूर : दुसऱ्यांदाही मुलगी झाल्याचा राग मनात धरून पतीसह सासरच्यांनी छळ केल्याची फिर्याद शहबाज इम्रान अत्तार (रा. मोमीन नगर, मुळेगाव रोड) यांनी एमआयडीसी पोलिसांत दिली. या प्रकरणी पतीसह सासू, सासऱ्यासह नऊ जणांविरुध्द गुन्हा दाखल झाला आहे.शहबाज यांचा इम्रान आत्तार याच्याशी विवाह झाला होता. सुरवातीला काही महिने त्यांचा संसार सुखाने सुरु होता. त्यांना पहिली मुलगी झाली.

त्यानंतर १० फेब्रुवारी २०१४ रोजी त्यांना दुसऱ्यांदाही मुलगीच झाली. त्याचा राग मनात धरून सासरच्यांनी तिचा छळ सुरु केला. तू तुझ्या आई-वडिलांकडून हुंडा, पैसे, दागिने आणले नाहीत, दोन्ही मुलीच जन्माला घातल्या, तू दरिद्री आहे. तुझा पायगुण चांगला नाही, तू आमच्या घरात राहण्याच्या लायकीची नाही, असे बोलून सातत्याने त्रास दिला. तसेच माहेरून नवीन फ्रिज, सोफासेट, कपाट असे साहित्य आण म्हणूनही मारहाण केली. शहबाज यांनी दिलेल्या फिर्यादीनुसार पती इम्रान दस्तगीर अत्तार, सासू सलिमा दस्तगीर अत्तार, सासरा दस्तगीर इमामसाब अत्तार, अबुबकर अत्तार, शबाना समीर अत्तार, समीर रशीद अत्तार, शबानाची जाऊ यास्मीन इरफान पठाण, नाजीया अश्‍पाक अत्तार, अश्‍पाक अहमद अत्तार (सर्वजण रा. मोमीन नगर, मुळेगाव रोड) यांच्याविरुध्द पोलिसांत गुन्हा दाखल झाला आहे. पुढील तपास पोलिस नाईक मुजावर हे करीत आहेत.

जेवण जास्त बनविल्याने मारहाण

शहबाज यांनी २८ जानेवारी २०२२ रोजी घरातील सर्वांसाठी स्वयंपाक तयार केला. सर्वजण जेवल्यानंतर जेवण अधिक झाले. त्याचा जाब विचारून पती इम्रानसह सर्वांनीच शहबाजला शिवीगाळ केली. त्यानंतर पती इम्राने याने घरातून प्लास्टिक पाईप आणला आणि शहबाजच्या सर्वांगावर मारहाण केली. त्यामध्ये तिला खूप मार लागला, असेही फिर्यादीत म्हटले आहे.