आमदार भारत भालके हे आजारी असताना देशाचे नेते शरद पवार यांनी रुग्णालयात जाऊन नानांना धीर दिला होता. त्यांच्या निधनानंतरही भालके कुटुंबाकडे लक्ष दिले. त्यापुढे जाऊन पोटनिवडणुकीत राष्ट्रवादीकडून भगीरथ भालकेंना उमेदवारीही दिली. इतकं सगळं करूनही राष्ट्रवादी व शरद पवार यांना दोषी धरून ‘बीआरएस’ची वाट धरण्याचा प्रकार म्हणजे शरद पवार यांचा विश्वासघात आहे, असा आरोप ‘विठ्ठल’चे अध्यक्ष अभिजित पाटील यांनी केला आहे. (Latest Marathi News)

सहकार शिरोमणी साखर कारखाना निवडणुकीच्या निमित्ताने पत्रकारांशी बोलताना श्री. पाटील यांनी भगीरथ भालके यांच्या हैदराबाद भेटीवर भाष्य केले.

श्री. पाटील म्हणाले, गेल्या वर्षभरापूर्वी एकमेकांच्या विरोधात बोलणारे, लढणारे भगीरथ भालके, युवराज पाटील, कल्याणराव काळे, गणेश पाटील हे सगळे कारखाना निवडणुकीत एकत्रित आले आहेत.(Latest Marathi News)

‘विठ्ठल’च्या वेळी थकीत ऊस बिलावरून भगीरथ भालकेंवर टीका करणारे युवराज पाटील आज ‘सहकार शिरोमणी’च्या थकीत ऊस बिलावर मूग गिळून गप्प आहेत. राजकारणात वारसा चालत नाही, अशी युवराज पाटलांवर टीका करणारे कल्याणराव काळे त्यावर काही बोलत नाहीत. केवळ स्वतःच्या स्वार्थासाठी हे एकत्रित आले आहेत. हीच गोष्ट सभासदांच्या लक्षात आली आहे. अन्यायाच्या विरोधात लढणाऱ्यांच्या पाठीशी सभासद ठामपणे उभा आहे.(Latest Marathi News)

कर्तृत्वशून्य असलेल्या भगीरथ भालकेंना लोकांनी जिल्हा परिषद निवडणुकीत चारीमुंड्या चित केले. विधानसभेला नाकारले. विठ्ठलच्या निवडणुकीत तर थेट घरी पाठवले; तरीही आरपारची भाषा केली जाते. शरद पवारांच्या आशीर्वादामुळे तीन वेळा आमदारकी मिळाली, याचा विसर त्यांना पडला आहे.

जनता याचा हिशेब घेतल्याशिवाय राहणार नाही. स्वार्थापोटी नेत्यावरील निष्ठा आणि पक्ष बदलू पाहणाऱ्या भगीरथ भालकेंना याची मोठी राजकीय किंमत मोजावी लागेल, असा इशाराही श्री. पाटील यांनी दिला आहे. यावेळी डॉ. बी. पी. रोंगे, अॅड. दीपक पवार आदी उपस्थित होते.(Latest Marathi News)