करमाळा (सोलापूर) : करमाळा शहरातील एका 25 वर्षीय तरूणांचा कोरोनाचा अहवाल पॉझिटिव्ह आला आहे. आतापर्यंत करमाळा तालुक्‍यात कोरोनाबाधित आढळले होत. मात्र करमाळा शहरात कोरोनाचा एकही रूग्ण आढळला नव्हाता. मात्र, आज कोरोनाने शहरात प्रवेश केले आहे. त्यामुळे नागरिकांमध्ये घबराटीचे वातावरण निर्माण झाले आहे. सोमवारी (ता. 13) हा अहवाल मिळाला असून या रुग्णांच्या सहवासात आलेल्या 33 लोकांना क्वारंटाइन करण्यात आले असल्याची माहिती तहसीलदार समीर माने यांनी दिली आहे. 
करमाळा शहरात पहिल्यांदाच कोरोनाचा रूग्ण आढळून आल्याने शहरात सर्व दुकाने बंद ठेवण्यात आली आहेत. आतापर्यंत तालुक्‍यातील जिंती येथे मोठ्याप्रमाणावर कोरोना रूग्ण आढळत आहे. मात्र आज शहरातही बाधित रूग्ण आढळून आला आहे. करमाळा शहरातील सिध्दार्थनगरमधील एका रूग्णास ता. 5 पासून ताप, सर्दी, खोकला या त्रास होत होता. यासाठी त्यांने प्राथमिक उपचार घेतले होते. आजारी पडल्यानंतर संबंधित रूग्णांने शहरातील मेनरोडवरील एका खाजगी रूग्णालयात उपचार घेतला आहे. त्यामुळे हे रूग्णालयही बंद ठेवण्यात आले असून डॉक्‍टर व कर्मचारी यांना क्वारंटाइन करण्यात आले आहे. हॉस्पीटलमध्ये या कालावधीत उपचारासाठी गेलेल्या रूग्णांची यादी ताब्यात घेण्यात आली आहे. ग्रामीण भागातून या खाजगी रूग्णालयात उपचारासाठी आलेल्या रुग्णांचा शोध घेण्याचे काम संबंधित गावचे तलाठी, ग्रामसेवक करत आहे. याशिवाय संबंधित रुग्णांच्या नातेवाईकांनाही क्वारंटाइन करण्यात आले आहे. 

संपादन : वैभव गाढवे