लवंग (सोलापूर) : कोरोना महामारी व मध्यंतरी बर्ड फ्लू रोगामुळे चिकनचे दर कमी झाले होते. मिळेल त्या दरात चिकनची व जिवंत पक्ष्यांची विक्री होत होती. मात्र आता चिकनच्या दराने बघता बघता दोनशेचा टप्पा पार केला असून, सध्या चिकन 220 ते 240 रुपये किलो दराने विकले जात आहे. याचे कारण बॉयलर कोंबड्यांच्या अपुऱ्या पुरवठ्यामुळे किरकोळ विक्रेत्यांकडे चिकनचे दर वधारले आहेत. 

कोरोनाच्या भीतीमुळे कोंबड्यांना दर राहील की नाही, या भीतीमुळे पोल्ट्री धारकांकडून कोंबड्यांचे कमी उत्पादन घेतल्याच्या परिणामामुळे चिकनचे दर भडकले आहेत. त्याच्या जोडीला जानेवारी महिन्यात आलेल्या बर्ड फ्लू रोगामुळे चिकनची पुरवठा साखळी विस्कळित होऊन घाऊक बाजारात कोंबड्यांची आवक घटल्याने दरात वाढ झाली आहे. 

साधारणपणे एक - दीड महिन्यापूर्वी किरकोळ स्वरूपात चिकन विक्रीचा दर 160 रुपये किलो होता. तर 15 - 20 दिवसांपूर्वी 180 रुपयांपर्यंत हा दर पोचला होता. सध्या तर आठवडाभरापासून हा दर वाढून 220 रुपयांपर्यंत पोचला आहे. कोंबड्यांची कमतरता राहिल्यास आणखी दर वाढतील, अशी शक्‍यता आयुब पठाण या चिकन विक्रेत्याने व्यक्त केली आहे. 

सध्या घाऊक बाजारात मागणी वाढल्याने किरकोळ विक्रेत्यांना 130 रुपये किलो याप्रमाणे कोंबड्या विकत घ्याव्या लागत आहेत. त्यातून सध्या 220 रुपयांपर्यंत चिकनचे दर गेले आहेत. सद्य:स्थितीत बाजारात मागणीपेक्षा पुरवठा 10 ते 15 टक्‍क्‍यांनी कमी झाला आहे. परिणामी चिकनच्या दरात वाढ होत आहे. 

पोल्ट्री व्यवसायातील स्थित्यंतरे 

• करोनाच्या साथीमुळे पोल्ट्री व्यवसायाला मोठा फटका 
• त्यानंतर डिसेंबर महिन्याच्या सुमारास चिकनचे दर काहीसे वाढले 
• त्यानंतर जानेवारीत आलेल्या बर्ड फ्लू रोगाच्या साथीने पोल्ट्री व्यावसायिकांकडील कोंबड्या विकल्या न गेल्याने पुन्हा चिकनची मागणी घटली 
• बर्ड फ्लूच्या धास्तीने अनेकांनी पोल्ट्रीमध्ये नवीन पिल्ले आणली नाहीत. पर्यायाने पोल्ट्री उत्पादनाच्या साखळीत खंड पडला 
• कडक उन्हाळ्यामुळे कोंबड्यांची मर वाढून वाढही कमी होते, त्यामुळेही पुरवठा कमी झाला आहे. 

संपादन : श्रीनिवास दुध्याल