सोलापूर : महापालिका आरोग्य विभागाकडून कोरोनाचा (Covid-19) प्रसार थांबविण्यासाठी एकीकडे लसीकरण (Covid Vaccination) मोहीम गतिमान करण्यात येत आहे. तर, दुसरीकडे त्याच विभागातील कर्मचाऱ्यांकडून पैसे घेऊन दोन डोस पूर्ण झाल्याचे बोगस प्रमाणपत्र देण्याचा सुळसुळाट सुरू असल्याची चर्चा आहे. याबाबत उपायुक्‍त धनराज पांडे (Dhanraj Pande) यांनी तत्काळ दखल घेत बोगसगिरी आढळून आल्यास संबंधित कर्मचाऱ्यासह नागरिकांवर गुन्हा (Crime) दाखल करण्याचा आदेश आरोग्य विभागाला दिला आहे.

कोरोनाच्या ओमिक्रॉन (Omicron) या नव्या व्हेरिएंटची भीती नागरिकांमध्ये पसरली आहे. यापासून संरक्षण करण्यासाठी गेल्या आठवडाभरापासून लसीकरण केंद्रांवर गर्दी वाढली आहे. नुकताच शासनाने नवीन आदेश काढून पुन्हा सार्वजनिक ठिकाणी कोरोना नियमांची कडक अंमलबजावणी करण्याच्या सूचना प्रशासनाला दिल्या आहेत. या सूचनांची अंमलबजावणी महापालिका प्रशासनाकडून करण्यात येत आहे. दोन डोस घेतलेल्या नागरिकांना सार्वजनिक ठिकाणी फिरण्याची मुभा दिली आहे. शासकीय कार्यालये, सार्वजनिक वाहतूक व्यवस्था, आस्थापने, व्यापारी संकुल आदी ठिकाणी दोन डोस घेतलेल्या नागरिकांनाच प्रवेश दिला जात आहे.

लसीचे डोस न घेतलेल्या नागरिकांवर अथवा व्यापाऱ्यांवर पाचशे रुपये ते पन्नास हजार रुपयांपर्यंत दंडात्मक कारवाईचे कडक निर्बंध लादले आहेत. या नव्या आदेशामुळे लस न घेताच नुसतेच डोस पूर्ण झाल्याचे प्रमाणपत्र घेण्याचे प्रमाण वाढत असल्याच्या तक्रारी महापालिकेकडे करण्यात आल्या आहेत. कोरोनाचा प्रसार रोखण्यासाठी दोन डोस घेण्यासाकरिता महापालिका प्रशासन एकीकडे विविध मोहिमा राबवीत आहे. तर, त्याच प्रशासनातील काही कर्मचारी पैसे घेऊन दोन डोस पूर्ण झाल्याचे बोगस प्रमाणपत्र वाटप करत असल्याची तोंडी तक्रार उपायुक्‍तांना प्राप्त झाली. या तक्रारीची त्वरित दखल घेत आरोग्य विभागप्रमुखांना तक्रारीत तथ्य आढळल्यास कर्मचाऱ्यासह संबंधित व्यक्‍तीवर गुन्हा दाखल करण्याचे आदेश दिले आहेत. आता या विभागातील कामकाजावर उपायुक्‍त पांडे हे करडी नजर ठेवून आहेत.

बातमीदार : प्रमिला चोरगी