सोलापूर : रुग्णांकडून भरमसाठ बिलांची वसुली केली जात असल्याच्या तक्रारी वाढल्याने आता महापालिका आयुक्‍त पी. शिवशंकर यांनी बिलांची पडताळणी करण्यासाठी 14 ऑडिटरची नियुक्‍ती केली आहे. तसेच नऊ आरोग्य मित्रांचीही नियुक्‍ती केली आहे. शासनाच्या निकषांनुसार बिलांची आकारणी झाल्याची पडताळणी ऑडिटर करतील, तर महात्मा फुले जनआरोग्य योजनेअंतर्गत कोणता रुग्ण पात्र आहे, याची पडताळणी आरोग्यमित्र करतील. 

हेही वाचा : मोठी ब्रेकिंग ! महापालिकेच्या उत्पन्नात 130 कोटींची तूट; तीन महिन्यांत मिळाला "एवढा'च कर 

रुग्ण तथा रुग्णांच्या नातेवाइकांना हॉस्पिटलमधील कोव्हिड-19 च्या बेडची उपलब्धतता माहिती होण्यासाठी http://117.247.89.137:85 ही लिंक दिलेली आहे. 24 हॉस्पिटलमध्ये किती बेड्‌स शिल्लक आहेत आणि किती आयसीयू बेड्‌स उपलब्ध आहेत, किती व्हेंटिलेटर्स उपलब्ध आहेत, याची माहिती त्यावर उपलब्ध होणार आहे. डी.सी.एस.च्या हॉस्पिटलमध्ये फक्त सिरिअस रुग्णांना उपचार घेता येणार आहे. कोव्हिड हॉस्पिटलमध्ये कोणताही रुग्ण आल्यानंतर त्याला दाखल करून घ्यावे. त्यानंतर प्राथमिक उपचार करून त्याला सी.सी.सी. सेंटरला रेफर करावयाचे आहे. झोपडपट्टी बाहेरील घर असल्यास त्यांना होम आयसोलेशनचा सल्ला द्यावा. डी.सी.ए. आणि डी.सी.एस.सी. यांच्याकडे एकूण 940 बेड्‌स कोव्हिडसाठी उपलब्ध करण्यास महापालिका आयुक्‍तांनी परवानगी दिली आहे. 

हेही वाचा : और हड्डी गले में फंस गई..! बोकडाच्या जेवणामुळे उघडकीस आली कैदी, पोलिस, गावकरी आणि कोरोनाची धक्कादायक कहाणी 

याव्यतिरिक्त 107 नवीन बेड्‌स कोव्हिडसाठी उपलब्ध करून देण्यात आले आहेत. तसेच महापालिकेने बलवंत इन्स्टिट्यूट न्यूरॉलॉजी, लाईफ लाइन हॉस्पिटल व अपेक्‍स हॉस्पिटल असे तीन अतिरिक्त हॉस्पिटल कोव्हिडसाठी अधिग्रहित केले आहेत. तसेच धनराज गिरजी हॉस्पिटल, नर्मदा हॉस्पिटल व स्पर्श हॉस्पिटलमध्ये कोव्हिडसाठी बेड्‌स वाढविले आहेत. कोव्हिड बाबतीत तक्रारींसाठी 0217-2740341 व मोबाईल क्रमांक 9607943100 यावर संपर्क साधावा, असे आवाहन महापालिकेकडून करण्यात आले आहे. 

संपादन : श्रीनिवास दुध्याल