सासुरे (ता. बार्शी, ता. सोलापूर) : कोरोनामुळे शाळा व महाविद्यालये गेल्या चार महिन्यापासून बंद आहेत. बहुतांश परीक्षा रद्द करण्याचा निर्णय शासनाने घेतला आहे. ऑनलाईन अभ्यासक्रम सुरू असला तरी चालू शैक्षणिक वर्ष सुरळीत केव्हा सुरू होणार, हे अद्यापही गुलदस्त्याच आहे. अजूनही कोरोनामुळे सर्वत्र लॉकडाउन आहेत. मात्र यातून शेती उद्योगाला मुभा असल्याने ग्रामीण भागातील विद्यार्थी आपली पिढ्यांपिढ्याच्या उपजीविकेचे साधन असलेल्या शेतीच्या कामात दंग आहेत. 
लॉकडाउनमुळे शहरी मुलांना घरात कोंडून राहावे लागले. मात्र ग्रामीण भागात कंटाळलेल्या विद्यार्थ्यांना शेतीमुळे विरंगुळा होत असला तरी यंदा वेळेत पावसाने हजेरी लावल्याने शेतात कामांची झुंबड उडाली आहे. ग्रामीण भागातील मुलांच्या ऑनलाइन अभ्यासाचे तीनतेरा वाजले असले तरी विद्यार्थ्यांना प्रदिर्घ सुट्ट्या मिळाल्यामुळे ही मुले पालकांच्या कामात चांगलीच उपयोगी पडत आहेत. 
सध्या शेतात सर्वत्र दुबार पेरणी, तुटाळ भरुण काढणे, कोळपणी, फवारणी, तण वेचणे अशा कामांची झुंबड उडाल्याने आपल्या आईवडिलांना मदतीसाठी विद्यार्थी शेता सरसावले असून राबताना दिसत आहेत. शहरी मुलांच्या तुलनेत ग्रामीण विद्यार्थ्यांकडे ऑनलाइन अभ्यासाची पुरेशी साधने उपलब्ध नसल्याने ती अभ्यासात रमलीच नाहीत. त्यात रेंज, अँड्रॉइड मोबाईल, ई-लर्निंग सुविधा, लॅपटॉप, संगणक या साधनांऐवजी त्यांच्याकडे खोऱ्या, पाटी, टिकाव, तिफन अन्‌ जनावरं हीच साधनं दिसत आहेत. ऑनलाइनची पुरेशी साधनं नसल्याने ग्रामीण विद्यार्थी अभ्यासाऐवजी शेतातच गुंतलेला दिसत आहे. त्यामुळे शिक्षणातील शहरी व ग्रामीण दरी गडद होताना दिसत आहे. यावर शासन काय उपाययोजना करणार हे पाहणे गरजेचं आहे. 

संपादन : वैभव गाढवे