मोहोळ : टाकळी सिकंदर ता मोहोळ येथील भीमा सहकारी साखर कारखान्याचे मार्गदर्शक संचालक, खासदार धनंजय महाडिक यांची सध्या होऊ घातलेल्या लोकसभेच्या निवडणुकीसाठी "स्टार प्रचारक" म्हणून निवड झाली असल्याची माहिती "भीमा" चे अध्यक्ष विश्वराज महाडिक यांनी दिली.

यामुळे मोहोळ तालुक्यातील भाजपा कार्यकर्ते व भीमा परिवारात आनंदाचे वातावरण पसरले आहे. खासदार महाडिक यांच्या निवडीचे पुळुज व परिसरातील गावे तसेच टाकळी सिकंदर येथे फटाके फोडून आनंद व्यक्त करण्यात आला.

खासदार महाडिक हे अनेक वर्षापासून सक्रिय राजकारणात आहेत. त्यांच्या पाठीशी विविध निवडणुकांचा कोल्हापूर सह सोलापूर जिल्ह्याचा मोठा अनुभव आहे. 80 टक्के समाजकारण व 20 टक्के राजकारण अशी त्यांची कार्यपद्धती आहे.

खासदार महाडिक यांनी कोल्हापूर महानगरपालिका, गोकुळ दूध संघ, कोल्हापुरातील दक्षिण व उत्तर विधानसभा मतदारसंघ या ठिकाणी यशस्वी प्रचार करून विजयश्री खेचून आणण्यात हातभार लावला आहे. संपूर्ण राज्याचे लक्ष वेधलेल्या टाकळी सिकंदर येथील भीमा व कोल्हापूर येथील राजाराम सहकारी साखर कारखान्याच्या निवडणुकात प्रभावी प्रचार करून त्यांनी विजयश्री खेचून आणली आहे.

मोहोळ तालुक्यातील जिल्हा परिषद व मोहोळ पंचायत समिती या ठिकाणीही त्यांनी सत्ता काबीज करण्यात विविध ठिकाणी सभा घेऊन विजय प्राप्त केला आहे. मोहोळ तालुक्यातील भीमा परिवाराची ही मोठी ताकद त्यांच्या पाठीशी आहे.

भाजपाने स्टार प्रचारक म्हणून जाहीर केलेल्या यादीत खासदार महाडिक यांचे नाव अग्रक्रमाने घेतले आहे. त्यांच्या प्रचाराचा सोलापूर लोकसभेचे उमेदवार माळशिरसचे आमदार राम सातपुते यांना सर्वात जास्त होणार आहे.