मोहोळ : गेल्या दोन दिवसा पासून मोहोळ तालुक्यातील काही भागात पडणाऱ्या पावसामुळे सर्व सामान्याला थोडासा का होईना दिलासा मिळाला आहे. "गणपतीने पाऊस आणला" अशी सर्वसामान्यांची भावना झाली आहे. त्यामुळे गुरुवारी आगमन होणाऱ्या गौराईच्या स्वागताची मोहोळ तालुक्यात जोरदार तयारी झाली आहे.

शिवाजी चौक ते लोकनेते चौकापर्यंत रस्त्याच्या दुतर्फा फराळाच्या पदार्थांचे स्टॉल सजले आहेत, ते खरेदी करण्यासाठी महिलांची बाजारपेठेत गर्दी झाली आहे. गौराईच्या आगमनाला ग्रामीण भागात "लक्ष्मीचा सण" म्हणून संबोधले जाते. लक्ष्मीचा सण म्हणजे मिनी दिपवाळीच.

लक्ष्मी आपल्या घरात कायम राहावी यासाठी तिच्यापुढे हजारो रुपये खर्च करून विविध फळांच्या साहित्यांच्या प्लेट, खेळणी, सफरचंद, मोसंबी, चिकू,या फळांचीही मांडणी केली जाते. अनेक आई-वडील विवाह झालेल्या मुलीला लक्ष्मीचे मुखवटे घेऊन देतात. 600 रुपया पासून एक हजार रुपया पर्यंत मुखवट्यांच्या किमती आहेत.

पूर्वी व ग्रामीण भागात आजही विविध साड्यांचा पडदा टाकून लक्ष्मीचा छत उभा करतात. मात्र त्याची जागा आता तयार छताने घेतली आहे. लक्ष्मी उभा करण्यासाठी लागणारे सांगाडे व फोल्डिंगचे पायऱ्यांचे रॅक बाजारात तयार उपलब्ध आहेत. एक हजारापासून ते पाच हजारापर्यंत तयार छतांच्या किमती आहेत.

चालू वर्षी फराळांच्या पदार्थात लाडू, म्हैसूरपाक व जिलेबी यांना मोठी मागणी असल्याचे व्यवसायिकांनी सांगितले. दरम्यान गुरुवारी गौराईचे आगमन असल्याने ज्वेलरीच्या मंगळसूत्र, गंठण, नेकलेस व अन्य महिलांच्या दागिन्यांना मागणी आहे. श्रीमंत कुटुंब या वस्तू तात्पुरत्या स्वरूपात सोन्याच्या घालतात.