अक्कलकोट : नाविंदगी ता.अक्कलकोट येथील सचिन हिरेमठ यांच्या केळीच्या बागेत बिबट्या आढळल्याने परिसरातील शेतकरी बांधवात घबराट पसरली आहे.नाविंदगी ते गौडगाव या गावाच्या रस्त्यावर नाविंदगी पासून एक किलोमीटर अंतरावर सचिन हिरेमठ यांची शेती आहे.त्यांची एक एकर केळीची बाग आहे.नेहमीप्रमाणे ते आपल्या केळी बागेची पाहणी करण्यासाठी शेतात गेली.

सहज आत जात असताना त्यांना बिबट्या दिसल्याने ते घाबरून पळाले दरम्यान त्यांनी प्रसंगावधान राखत फोनाफोनी करून वनअधिकारी कार्यालय सोलापूर येथे संपर्क साधून याची माहिती दिली.ही घटना वाऱ्यासारखी सर्वत्र पसरली त्याने लोक त्या शेतीकडे गेले आणि शे दीडशे जणांचा जमाव त्या ठिकाणी जमला.आता साडेचार वाजेपर्यंत तरी बिबट्या माझ्या केळीच्या बागेतच आहे असे शेतकरी सचिन हिरेमठ यांनी सांगितले पण काही नागरिक म्हणतात की त्याच्या सोबत आणखी एक बिबट्या देखील असल्याचे इतर शेतकऱ्यांचे म्हणणे आहे.पण त्याला अधिकृत दुजोरा मिळू शकला नाही. आज दुपारी साडे अकरा ते बारा वाजण्याच्या दरम्यान हा बिबट्या मी स्वतः पाहिल्याचे हिरेमठ यांनी सांगितले.दरम्यान चार जणांचे वन खात्याचे कर्मचारी व पोलीस प्रशासन देखील त्या ठिकाणी दाखल झाले असून ते यावर कार्यवाही करीत आहेत.

याठिकाणी अक्कलकोटचे आमदार सचिन कल्याणशेट्टी यांनी हिरेमठ यांच्या शेतीस भेट देऊन पाहणी करून तेही नागरीकांसोबत अद्याप तिथेच आहेत. त्यांनी वन कर्मचारी यांच्याशी चर्चा केली आणि याबाबत योग्य ती काळजी घेण्याचे सूचना केली.वनखात्यातील कर्मचाऱ्यांत रुकेश कांबळे,संदीप मेंगाळ,गंगाधर विभूते आदींसह रेस्क्यू टीमसुद्धा एक पुणे व दुसरा सोलापूर येथून सहभाग घेण्यासाठी निघाल्याचे रुकेश कांबळे यांनी सकाळशी बोलताना सांगितले.