मोहोळ - मोटरसायकल व एस टी यांची समोरासमोर धडक होऊन झालेल्या अपघातात मोटरसायकल स्वाराचा मृत्यू झाला. हा अपघात शेटफळ- पंढरपूर या महामार्गावरील आष्टी ता मोहोळ गावच्या शिवारात सकाळी पावणे बारा वाजता झाला. भारत बाजी सुरवसे वय 65 रा नजीक पिंपरी ता मोहोळ असे मृत इसमाचे नाव आहे. या अपघाताची नोंद मोहोळ पोलिसात झाली आहे.

मोहोळ पोलिसांकडून मिळालेल्या माहिती नुसार, मृत भारत सुरवसे हे मोटरसायकल क्र एम एच 13 एल 5250 वरून पंढरपूरहुन शेटफळेच्या दिशेने येत होते, तर एस टी क्रमांक एम एच 14 बी टी 4575 ही बार्शीहून पंढरपूरकडे निघाली होती.

दोन्ही वाहने आष्टी शिवारातील एका हॉटेल जवळ येताच त्यांची समोरासमोर धडक झाली. धडक होताच भारत सुरवसे यांच्या डोक्याला मार लागून ते गंभीर जखमी झाले व रक्ताच्या थारोळ्यात पडले. त्याचवेळी त्या ठिकाणा हुन माढ्याचे तहसीलदार विनोद रणवरे हे निघाले होते.

त्यांनी ही घटना पाहताच रुग्णवाहिकेला फोन केला व उपचारासाठी सुरवसे यांना पंढरपूर येथील कॉटेज हॉस्पिटलला रवाना केले. डॉक्टरांनी तपासून उपचारापूर्वीच भारत सुरवसे यांना मृत घोषित केले. या अपघाताची नोंद मोहोळ पोलिसात झाली असून अधिक तपास पोलीस उपनिरीक्षक ज्योतिबा पवार करीत आहेत.