सोलापूर : कोरोनाचे रुग्ण दिवसेंदिवस वाढत असून सध्या पंढरपूर तालुक्यात सर्वाधिक ४० रुग्ण आहेत. दिलासादायक बाब म्हणजे सहा ते आठ दिवसांत बरे होणाऱ्या रुग्णांची संख्या मोठी आहे. सात तालुक्यातील नागरी भागात सध्या एकही रुग्ण नाही. तीव्र किंवा मध्यम लक्षणे असलेल्या रुग्णांची संख्या खूपच कमी आहे.

कोरोनाच्या तिसऱ्या लाटेनंतर आता पुन्हा कोरोनाचे रुग्ण वाढत आहेत. सोलापूर जिल्हा कोरोनामुक्तीच्या वाटेवर होता. काही दिवस सोलापूर शहर कोरोनामुक्त राहिले. पण, आता मागील १८ ते २० दिवसांत तब्बल पावणेतीनशे रुग्ण वाढले आहेत. सध्या शहरात १४१ तर ग्रामीणमध्ये १०५ सक्रिय रुग्ण आहेत. शनिवारी (ता. ९) शहरात ३२ तर ग्रामीणमध्ये १६ नवीन रुग्ण वाढले आहेत. पण, दिलासादायक बाब म्हणजे शहरातील २८ तर ग्रामीणमधील १५ रुग्ण कोरोनामुक्त झाले. सध्या अक्कलकोट, करमाळा, माळशिरस, मोहोळ, उत्तर सोलापूर, सांगोला व दक्षिण सोलापूर या तालुक्यातील नागरी भागात कोरोनाचा एकही रुग्ण आढळलेला नाही. सद्यस्थितीत पंढरपूर तालुक्यात ४०, माढा २५, अक्कलकोट ९, माळशिरस तालुक्यात ८ सक्रिय रुग्ण आहेत. पॉझिटिव्ह रुग्णांमध्ये तीव्र किंवा मध्यम स्वरूपाची लक्षणे असलेल्या रुग्णांची संख्या खूपच कमी आहे. बहुतेक रुग्ण त्यांच्याच घरी वैद्यकीय तज्ज्ञांच्या सल्ल्यानुसार उपचार घेऊन बरे होत आहेत.

जिल्ह्यात १.२० लाख डोस शिल्लक

जिल्ह्यातील १२ वर्षांवरील सर्वांनाच आता कोरोनावरील प्रतिबंधित लस टोचली जात आहे. पण, १५ ते १७ वयोगटातील तरुणांचा लसीकरणाला प्रतिसाद खूपच कमी आहे. दुसरीकडे संरक्षित डोस व दुसरा डोस न घेणाऱ्यांची संख्याही खूप मोठी आहे. कोरोनाची तीव्रता कमी झाल्याने लस टोचायला येणाऱ्यांची संख्या घटली आहे. त्यामुळे सध्या जिल्ह्यात कोविशिल्ड लसीचे ६० हजार तर कोवॅक्सिन व कोर्बोवॅक्स लसीचे प्रत्येकी ३० हजार डोस शिल्लक असल्याची माहिती लसीकरणाचे जिल्हा समन्वयक डॉ. अनिरूध्द पिंपळे यांनी दिली.