सोलापूर : सोलापूर (Solapur) जिल्हा आणि राष्ट्रवादीचे अध्यक्ष शरद पवार (Sharad Pawar) यांचे अतूट नाते आहे. राष्ट्रवादीत फूट पडल्यानंतर कधी नव्हे ते सोलापूर जिल्ह्यात राष्ट्रवादीला मोठा फटका बसला आहे.

जिल्ह्यातील राष्ट्रवादीची पुनर्बांधणी करण्यासाठी पक्षाध्यक्ष शरद पवार सोलापूरच्या दौऱ्यावर कधी येणार? याकडे शरद पवार गटातील राष्ट्रवादीच्या पदाधिकाऱ्यांचे व कार्यकर्त्यांचे लक्ष लागले आहे.

उपमुख्यमंत्री अजित पवार यांच्यासोबत गेलेल्या आमदारांच्या मतदार संघात जाऊन सभा घेणार असल्याची घोषणा शरद पवार यांनी केली आहे. त्यानुसार मंत्री छगन भुजबळ यांच्या मतदार संघापासून पवार यांनी दौऱ्याला सुरवात केली आहे. येत्या आठ ते दहा दिवसांमध्ये शरद पवार यांचा सोलापूर दौरा होण्याची शक्यता व्यक्त होत आहे.

तत्पूर्वी पक्षीय स्तरावरील एक दौरा होण्याची शक्यता आहे. या दौऱ्यात शरद पवार काय भूमिका घेतात? जिल्ह्यातील कोणत्या प्रस्थापितांच्या विरोधात कोणाला ताकद देतात? याकडे सर्वांचे लक्ष लागले आहे. शरद पवार यांच्या राष्ट्रवादीतून सोडून गेलेल्या पदाधिकाऱ्यांच्या जागी कोणाला संधी मिळते? याकडेही सर्वांचे लक्ष लागले आहे.