निमगाव (सोलापूर) : दिवसेंदिवस ग्रामीण भागात कोरोनाचा विळखा घट्ट होताना दिसत आहे. निमगाव (ता. माळशिरस) येथील एकाच कुटुंबातील सहा व्यक्तींचा कोरोना अहवाल पॉझिटिव्ह आला असून, एका व्यक्तीचा अहवाल प्रलंबित आहे. या कुटुंबातील एका सदस्याचा संपर्क बऱ्याच ठिकाणी असल्याने निमगावकर मात्र चांगलेच धास्तावले आहेत. 

हेही वाचा : सोलापूर ग्रामीणमध्ये 330 पॉझिटिव्ह रुग्ण; आठ जणांचा मृत्यू; बाधितांची संख्या 7390 

विदेशातून भारतात आलेल्या कोरोना विषाणूचा संसर्ग शहरांसह आता ग्रामीण भागात मोठ्या प्रमाणात पसरत आहे. काही दिवसांपूर्वीच निमगावमध्ये बाहेरून आलेली एक व्यक्ती कोरोना बाधित सापडली होती. त्यानंतर अद्यापपर्यंत एकही बाधित रुग्ण सापडला नाही. परंतु, बुधवार रोजी एक रुग्ण बाधित सापडला. या रुग्णास माळशिरस येथे उपचारासाठी दाखल करण्यात आले होते. त्यानंतर आरोग्य विभागाने या रुग्णाच्या कुटुंबातील इतर व्यक्तींचे स्वॅब घेऊन सोलापूर येथे तपासणीसाठी पाठवले असता, पाच व्यक्तींचा अहवाल पॉझिटिव्ह आला आहे. या कुटुंबातील एक सदस्य बऱ्याच नागरिकांच्या संपर्कात आला आहे, त्यामुळे या रुग्णाच्या संपर्कातील लोकांना शोधण्याचे मोठे आव्हान आरोग्य विभागापुढे असणार आहे. निमगावमध्ये एकाच वेळी सहा कोरोना बाधित रुग्ण सापडल्यामुळे निमगाव व परिसरात भीतीचे वातावरण निर्माण झाले आहे. 

जिल्हा परिषद सदस्या ज्योती पाटील यांनी ग्रामस्थांना आवाहन केले, की कोरोनाचा संसर्ग वाढू नये यासाठी ग्रामस्थांनी सार्वजनिक ठिकाणी गर्दी करू नये. कोरोनापासून रक्षणासाठी मास्क, सॅनिटायझरचा उपयोग करावा. महत्त्वाचे काम असेल तरच घराबाहेर पडावे. अफवा पसरवू नये व अफवांवर विश्‍वास ठेवू नये. घरातच राहा. काळजी घ्या. 

संपादन : श्रीनिवास दुध्याल