सोलापूर : माल वाहतूक करणाऱ्या वाहनांना माल वाहतूक करण्याची परवानगी अगोदर आहेच. त्यामुळे अशा वाहनांना अटकाव करु नये. माल वाहतूक वाहनांना स्वतंत्र परवानगी घेण्याची आवश्‍यकता नाही, असे निर्देश राज्याचे विशेष पोलिस महानिरीक्षक मिलिंद भारंबे यांनी 31 मार्च रोजी पोलिस प्रशासनाला दिले आहेत. 

हेही नक्‍की वाचा : अबब...! कारागृहाची क्षमता 141 अन्‌ सध्या आहेत 428 कैदी 

कोरोना या विषाणूचा प्रसार मोठ्या प्रमाणावर होत असल्याने त्याचा प्रादुर्भाव रोखण्यासाठी महाराष्ट्रासह संपूर्ण देशात लॉकडाउन जाहीर करण्यात आला आहे. या कालावधीत नागरिकांना एका ठिकाणाहून दुसऱ्या ठिकाणी प्रवास करण्यास बंदी घालण्यात आली आहे. त्यामुळे महाराष्ट्रातील नागरिक अत्यावश्‍यक सेवा तथा प्रवास करण्यासाठी मोठ्या प्रमाणावर पासेस मिळविण्यासाठी ऑनलाइन अर्ज करु लागले आहेत. अर्जाचा ढिग पाहता पूर्वीच्या आदेशात बदल करण्यात आला आहे. त्यानुसार एखादा नागरिक सध्या रहिवाशी जिल्ह्यांमध्ये अथवा त्या जिल्ह्यातून दुसऱ्या जिल्ह्यात प्रवास करणार असल्यास त्याची कारणे शोधून संबंधित पोलिस उपायुक्‍त किंवा पोलिस अधिक्षकांनी त्याला परवानगी द्यावी, असे नव्या आदेशात नमूद करण्यात आले आहे. तसेच महाराष्ट्रातून एखादा नागरिक दुसऱ्या राज्यात प्रवास करणे अत्यावश्‍यक असल्यास अशा नागरिकांनीच फक्‍त अत्यावश्‍यक सेवेसाठी परवानगी मिळण्याकरिता पोलिस महासंचालकांकडे रितसर अर्ज करावा, असेही नमूद करण्यात आले आहे. माल वाहतूक करणाऱ्या वाहनांना यापूर्वीच परवानगी देण्यात आल्याने त्यांना पुन्हा परवानगी घेण्याची गरज नसल्याचेही श्री. भारंबे यांनी स्पष्ट केले आहे. 

हेही नक्‍की वाचा : मोठी बातमी ! सोलापूर ते नेलमंगला रो-रो सेवेला मान्यता 

केंद्रीय मुख्य सचिवांनीही दिले पत्र 
कोरोना या विषाणूचा संसर्ग रोखण्यासाठी संपूर्ण देशात 14 एप्रिलपर्यंत लॉकडाउन जाहीर करण्यात आला आहे. या पार्श्‍वभूमीवर कोणत्या वाहनास अथवा व्यक्‍तीस वाहतुकीसाठी परवानगी द्यावी, याबद्दल भारत सरकारचे मुख्य सचिव अजयकुमार भल्ला यांनी 29 मार्च रोजी देशातील सर्व राज्य सरकारांना पत्र पाठविले आहे. त्यानुसार विशेष पोलिस महानिरीक्षक मिलिंद भारंबे यांनी नवे आदेश दिले आहेत. ऑनलाइन अर्ज करणाऱ्या वाहनचालकांना त्यांचे पत्र पाठविले जात असल्याची माहिती उपप्रादेशिक परिवहन अधिकारी संजय डोळे यांनी स्पष्ट केले.