सोलापूर : सोलापूर जिल्ह्यात आतापर्यंत ६० हजार ४७२ कुणबी मराठाच्या नोंदी आढळल्या आहेत. नोंदी मोठ्या प्रमाणात आढळल्या आहेत, परंतु आतापर्यंत केवळ ५ हजार २७७ कुणबी दाखल्यांचेच वाटप झाले आहे. सापडलेल्या नोंदीच्या दहा टक्केही दाखले अद्याप जिल्ह्यातील मराठा समाजाला मिळाले नसल्याचे भीषण वास्तव समोर आले आहे.

मनोज जरांगे-पाटील यांच्या आंदोलनामुळे राज्यभरातील कुणबी नोंदीचा शोध घेण्यात आला आहे. या शोध मोहिमेत जिल्ह्यात आतापर्यंत ६० हजार ४७२ नोंदी सापडल्या आहेत. मुख्यमंत्री एकनाथ शिंदे यांनी राज्यातील मराठा समाजाला दहा टक्क्यांचे आरक्षण देण्याची घोषणा २० फेब्रुवारी रोजी केली आहे.

या घोषणेला आता एक महिना होत आला तरीही या नव्या आरक्षणानुसार जातीचा दाखला कसा काढावा? याबद्दलची कसलीच नियमावली जिल्हा प्रशासनाकडे आलेली नाही. नव्या आरक्षणाची नियमावली नाही, कुणबीची नोंद आढळली आहे. परंतु जात प्रमाणपत्र काढण्यासाठी प्रशासकीय अडथळ्यांची शर्यत संपत नाही, अशा दुहेरी संकटात मराठा समाजाला कसरत करावी लागत आहे.

आकडे बोलतात

• आढळलेल्या नोंदी : ६० हजार ४७२

• स्कॅनिंग केलेल्या नोंदी : ६० हजार ४६०

• संकेतस्थळावर अपलोड नोंदी : ४० हजार ८५२

• कुणबी दाखल्यासाठी प्राप्त अर्ज : ५ हजार ५८९

• वाटप झालेले कुणबी प्रमाणपत्र : ५ हजार २७७

• कुणबीचे नामंजूर अर्ज : ५२

• कुणबीचे प्रलंबित अर्ज : २६०

जिल्ह्यात आतापर्यंत ज्या ज्या व्यक्तींनी कुणबी दाखला मिळावा, यासाठी अर्ज केला आहे. त्यापैकी ९७ टक्के व्यक्तींना जिल्हा प्रशासनाच्यावतीने कुणबी दाखल्यांचे वाटप करण्यात आले आहे. प्रलंबित अर्जाचीही संख्या कमी आहे.

- कुमार आशीर्वाद, जिल्हाधिकारी

जिल्ह्यात नोंदी आढळल्या आहेत, परंतु आढळलेल्या नोंदीपासून ते कुणबी दाखला काढण्यापर्यंतची प्रक्रिया किचकट व वेळखाऊ आहे. या प्रक्रियेत अनेक ठिकाणी पैशांची मागणी होत असल्याच्या तक्रारी आहेत. एका प्रमाणपत्रासाठी २५ ते ५० हजार रुपयांपर्यंत विविध टप्प्यांवर मागणी होत असल्याने शेतकरी, शेतमजूर एवढी रक्कम कोठून आणणार? ज्यांच्या नोंदी आढळल्या आहेत, त्यांना प्रमाणपत्र देण्यासाठी प्रशासनाने शिबिर घ्यावे.

- माऊली पवार, समन्वयक, सकल मराठा समाज

निवडणूक कामकाजाचे कारण सांगून आतापर्यंत अधिकाऱ्यांनी दाखले प्रलंबित ठेवले होते. सध्या पोलिस भरतीसह इतर भरतीच्या प्रक्रिया सुरू आहेत. नोकरीसाठी जातीच्या दाखल्यांची मागणी केली आहे. दफ्तर दिरंगाईमुळे सर्वसाधारणमधूनच प्रयत्न करावा लागत आहे.

- शंभू साठे, माढा