वळसंग(सोलापूर): वळसंग (ता. दक्षिण सोलापूर) येथे सारीचा रुग्ण आढळल्याने परिसरातील नागरिकांत घबराट पसरली आहे. या प्रकाराने प्रत्येक जण सतर्क झाला आहे. येथील मटन विक्रेत्याच्या कुटुंबातील एक सदस्य सारी रुग्ण असल्याचे आढळल्याने खवय्यांचे धाबे दणाणले. 

हेही वाचाः बाजारात गर्दीच्या कारणावरून पोलिस पुन्हा आक्रमक 

कोरोनाचा प्रादुर्भाव टाळण्यासाठी स्थानिक कोरोना प्रतिबंधक समितीने जनता कर्फ्यूचे आवाहन केले आहे. बुधवार (ता. 10)पर्यंत हा जनता कर्फ्यू लागू राहणार आहे. दरम्यान, अक्कलकोट व सोलापूर परिसरातील सर्व मोठी दुकाने, व्यवसाय बंद आहेत. त्यामुळे वळसंगमध्ये 30 ते 35 किलोमीटर अंतरावरील लोकांची ये-जा खरेदीसाठी होती. 

हेही वाचाः कोरोना रुग्णांच्या स्थितीवरून ठरतील उपचाराचे निर्णय 

रमजान व कारहुणवी या सणांमुळे मोठ्या प्रमाणात आर्थिक उलाढाल झाली. त्याचा परिणाम होऊन परिसरात आणखी रुग्ण वाढतील की काय, अशी शक्‍यता निर्माण झाली आहे. आमदार सचिन कल्याणशेट्टी, तहसीलदार अमोल कुंभार, गटविकास अधिकारी राहुल देसाई यांनी वळसंगला भेट देऊन परिस्थितीची पाहणी केली व खबरदारीच्या सूचना केल्या. सहायक पोलिस निरीक्षक श्री. माणगावे, तलाठी सचिन साळवे, ग्रामविकास अधिकारी दस्तगीर नदाफ, आरोग्य सहायक समीर शेख, सुनंदा बागलकोटी यांच्याकडून परिसर नाकेबंदीचे काम युद्धपातळीवर होत आहे.