सोलापूर - रस्त्यावर आणि महामार्गावर धावणारे वाहन तांत्रिकदृष्ट्या फिट असणे आवश्यक आहे. वाहनांमध्ये छोटासा बिघाड झाल्यास अपघात होण्याची शक्यता असते. त्यामुळे वाहनांचे फिटनेस सर्टिफिकेट महत्त्वाचे आहे. मात्र मागील वर्षभरात सोलापूर उपप्रादेशिक परिवहन कार्यालयाकडून फिटनेस सर्टिफिकेट नसलेल्या ७११ वाहनांवर कारवाई करून १३ लाख ५२ हजार रुपयांचा दंड वसूल करण्यात आला आहे.

विशेषतः प्रवासी व मालवाहतूक वाहनांचे फिटनेस सर्टिफिकेट करून घेणे आवश्यक आहे. मालवाहतूक वाहने लांब पल्ल्याच्या मार्गावर वाहतूक करीत असतात. यात ट्रॅव्हल्स, एसटी बस, ट्रक या वाहनांचा समावेश आहे. त्यामुळे अशा वाहनांची नियमित देखभाल- दुरुस्ती करणे आवश्यक आहे. योग्यता नसलेली वाहने रस्त्यावर धावत असल्याने अपघात होऊन धोका निर्माण होण्याची शक्यता नाकारता येत नाही.

सोलापूर उपप्रादेशिक परिवहन कार्यालयात वाहनांच्या फिटनेसची तपासणी केली जाते. वाहनांच्या ब्रेकपासून ते लाईट, टायर व तांत्रिक बाबींची अधिकाऱ्यांकडून पाहणी करून योग्यता प्रमाणपत्र दिले जाते. एकंदरीत वाहन रस्त्यावर धावण्यासाठी व्यवस्थित असल्याचे योग्यता प्रमाणपत्र मिळते. फिटनेस नसल्यास प्रतिवाहन दंड आकारला जातो. त्यानंतर दिवसाला शंभर रुपये दंड आकारण्यात येत असल्याचे सांगण्यात आले.

अशी झाली कारवाई

महिना वाहने दंड

जून २०२१ १४ ५२ हजार

जुलै ३९ १ लाख २८ हजार

ऑगस्ट - ०० ००

सप्टेंबर - ७ ००

ऑक्टोबर - ७ ८ हजार

नोव्हेंबर - ७ ००

डिसेंबर - ६१ १ लाख ४० हजार

जानेवारी २०२२ ११४ ३ लाख ३६ हजार

फेब्रुवारी - १२२ १ लाख ७६ हजार

मार्च - २४९ ३ लाख ८४ हजार

एकूण ७११ १३ लाख ५२ हजार