Solapur News: येथील कुंभारी परिसरातील रे नगरात पंतप्रधान आवास योजनेअंतर्गत ३० हजार घरकुलांचे काम सुरु आहे. पहिल्या टप्प्यात १५ हजार घरे बांधून पूर्ण झाली आहेत. सध्या अंगणवाड्या, रस्त्यासह सांडपाणी प्रक्रिया केंद्राचे (एसटीपी) काम युद्धपातळीवर सुरु आहे.

१५ हजार घरांच्या लोकार्पणासाठी पंतप्रधान नरेंद्र मोदी यांचा २५ डिसेंबर रोजी सोलापूर दौरा शक्य आहे. पंतप्रधान आवास योजनेअंतर्गत रे नगर परिसरात देशातील सर्वात मोठा ३० हजार घरकुलांचा प्रकल्प ‘म्हाडा’च्या माध्यमातून उभारला जात आहे.

त्याची मुदत डिसेंबर २०२४पर्यंत आहे. तत्पूर्वी, १५ हजार घरांचे काम पूर्ण झाले आहे. त्या घरांची रंगरंगोटी पूर्ण झाली असून आता अंतर्गत रस्ता व एसटीपीचे काम युद्धपातळीवर सुरू आहे. आता त्याठिकाणी ४० अंगणवाड्यांचे बांधकाम सुरू असून त्यातील तीन अंगणवाड्यांचे काम अंतिम टप्प्यात आहे.

उर्वरित अंगणवाड्यांची कामे पूर्ण झाली आहेत. आता काही दिवसांत त्याठिकाणी येणाऱ्या चिमुकल्यांना शिकविण्यासाठी सेविकांची नेमणूक केली जाणार आहे. त्याचबरोबर या प्रकल्पाच्या ठिकाणी जिल्हा परिषदेच्या सहा शाळा सुरू केल्या जाणार आहेत.

त्यात इयत्ता पहिली ते सातवीपर्यंतच्या तीन उर्दू व तीन मराठी माध्यमांच्या शाळा आहेत. त्यासाठी त्रुटींची पूर्तता करून केंद्र सरकारकडे फेरप्रस्ताव पाठविला आहे. त्यांची मंजुरी मिळाल्यानंतर रे नगर प्रकल्पाच्या ठिकाणी जिल्हा परिषदेतर्फे सहा शाळा सुरू होतील.

दरम्यान, या घरकूल प्रकल्पाच्या कामाची स्थिती पाहण्यासाठी ‘पीएमओ’ कार्यालयाचे अधिकारी १५ ते २० डिसेंबर दरम्यान सोलापुरात येणार आहेत. त्यानंतर पंतप्रधान नरेंद्र मोदी हे २५ डिसेंबरला की पुढे कधी, यासंबंधीचा दौरा निश्चित होणार आहे.

लोकसभेच्या आचारसंहितेपूर्वी कार्यक्रम

‘रे नगर’चा घरकूल प्रकल्पाअंतर्गत १५ हजार घरे बांधून तयार आहेत. पण, अंतर्गत रस्ते, सांडपाण्याच्या शुद्धीकरणाची व्यवस्था, दिवाबत्ती, शाळांची कामे अजूनही सुरुच आहेत. माजी पंतप्रधान स्व. अटलबिहारी वाजपेयी यांच्या जयंतीनिमित्त २५ डिसेंबरला लोकार्पण सोहळा घेण्याचे नियोजित आहे.

कामे पूर्ण न झाल्यास हा सोहळा पुढे काही दिवस लांबणीवर जाऊ शकतो. तरीपण, लोकसभेची आचारसंहिता जाहीर होण्यापूर्वी हा लोकार्पण सोहळा पार पडणार आहे.

‘एसटीपी’चे काम २० डिसेंबरपर्यंत

रे नगर प्रकल्पातील घरांमधील सांडपाणी एकत्रित साठवून त्यावर प्रक्रिया करून शुद्ध पाणी ‘एनटीपीसी’ला दिले जाणार आहे. सध्या त्या सांडपाणी प्रक्रिया केंद्राचे काम हाती घेण्यात आले आहे. २० डिसेंबरपर्यंत काम पूर्ण करण्याचे नियोजन असल्याची माहिती ‘म्हाडा’च्या वरिष्ठ अधिकाऱ्यांनी ‘सकाळ’शी बोलताना दिली. जिल्हाधिकारी कुमार आशीर्वाद यांच्यासह माजी आमदार नरसय्या आडम यांचाही त्यासंबंधी सतत पाठपुरावा सुरू आहे.