सोलापूर : राज्यात झपाट्याने वाढलेली लोकसंख्या, नागरी विकास योजनांचा वेग वाढविण्याची गरज लक्षात घेऊन महापालिका व नगर परिषदांमधील निर्वाचित सदस्यांच्या संख्येत 17 टक्के इतकी वाढ करण्याचा निर्णय राज्य मंत्रिमंडळाच्या (State Cabinet) बैठकीत झाला आहे. या निर्णयानुसार सोलापूर जिल्ह्यातील (Solapur District) दहा जुन्या नगर परिषदांमध्ये तब्बल 35 नगरसेवकांची संख्या वाढण्याची शक्‍यता आहे.

कोरोनामुळे 2021 च्या जनगणनेचे निष्कर्ष अप्राप्त आहेत. त्यास आणखीन काही कालावधी लागण्याची शक्‍यता आहे. या कालावधीत लोकसंख्या वाढीचा सरासरी वेग गृहीत धरून अधिनियमात नमूद केलेल्या महापालिका व नगरपरिषदांमधील किमान सदस्य संख्येत 17 टक्के वाढ करण्याचा निर्णय झाला आहे. सोलापूर जिल्ह्यातील बार्शी ही एकमेव नगरपरिषद अ वर्गात आहे. ब वर्गाच्या नगरपरिषदांमध्ये पंढरपूर व अक्कलकोट नगरपरिषदांचा समावेश आहे. सांगोला, मंगळवेढा, करमाळा, कुर्डुवाडी, मैंदर्गी, दुधनी, मोहोळ या सात नगरपरिषदा क वर्गात मोडतात. शासनाने सदस्य संख्या वाढीचा निर्णय हा महापालिका व नगरपरिषदांसाठी घेतला आहे. नगर पंचायतींना हा निर्णय लागू होणार की नाही? याबाबत अद्यापही स्पष्टता नाही. त्यामुळे नगरसेवकांच्या सदस्य संख्या वाढीचा लाभ नगरपंचायतींना मिळण्याची शक्‍यता कमीच आहे.

बार्शीत सहा, पंढरपुरात पाच नगरसेवक वाढणार

सध्या नगरपरिषदांध्ये जनतेतून निवडून येण्यासाठी असलेल्या एकूण जागांमध्ये 17 टक्के सदस्य वाढणार आहेत. त्यामुळे बार्शीत सहा, पंढरपूरमध्ये पाच, अक्कलकोटमध्ये चार नगरसेवक वाढण्याची शक्‍यता आहे. सांगोला, मंगळवेढा, करमाळा, कुर्डुवाडी, मैंदर्गी, दुधनी या नगरपरिषदांमध्ये प्रत्येकी तीन नगरसेवक वाढण्याची शक्‍यता आहे. मोहोळ नगरपरिषदेत दोन नगरसेवक वाढण्याची शक्‍यता आहे. जिल्ह्यात सध्या दहा नगरपरिषदांमधून 265 नगरसेवक जनतेतून निवडून येतात. त्यामध्ये आता 35 जागांची भर पडण्याची शक्‍यता आहे.