सातारा ः खार हा तसा भित्रा प्राणी आहे पण साताऱ्यातील एका शाळेत माणसाळलेली खार तुम्हांला पाहवयास मिळेल. हो माणसाळेली खार. आश्‍चर्य वाटले ना तुम्हांला. पण हे खरे आहे. साताऱ्यातील पालिकेच्या शाळा क्रमांक सहा म्हणजेच ज्ञानगंगा विद्यामंदिर येथे दररोज एक खारुताई येते. ती ना शिक्षकांना घाबरते ना मुलांना. ती विद्यार्थ्यांच्या वह्यांवर बसते, पुस्तकांशी खेळते. तिला मुलांचा आणि मुलांना तिचा लळा लागला आहे.
 
सातारा पालिकेच्या शहारातील विविध भागात एकूण 18 शाळा आहेत. त्यामधील काही शाळांचा परिसर वृक्षांनी बहरला आहे. त्यापैकीच एक शाळा क्रमांक सहा म्हणजेच ज्ञानगंगा विद्यामंदिर. या शाळेची घंटा वाजली की विद्यार्थ्यांप्रमाणे एक छोटीशी खारुताई बिंदास्त शाळेत येते. केवळ शाळेत येत नाही तर वर्गात जाऊन बसते. कधी ती विद्यार्थ्यांच्या पुस्तकांवर असते तर कधी वह्यांवर.

हेही वाचा - साडेचार कोटींच्या दरोड्याचा चार तासांत पर्दाफाश

एकवेळ आम्ही शाळेत येणार नाही परंतु खारुताई येईल असे गमतीने विद्यार्थी सांगतात. विद्यार्थी म्हणतात आमचा वर्ग संपेपर्यंत खारुताई वर्गातच बसून असते. आम्ही मैदानावर गेलो की खारुताई आमच्या पाठीमागे पळत येते. तर कधी आम्ही तिच्या मागे पळत जातो. मैदानावर आम्ही धमाल करतो. तिचा आम्हांला कोणताही त्रास होत नाही. खारुताईच्या येण्याने आम्हांला खूप आनंद होतो.

नक्की वाचा - चिमुरडी उभारतेय माणुसकीची भिंत

दरम्यान या शाळेच्या शिक्षकांना जेव्हा खारुताईची माहिती मिळाली तेव्हा तिला विद्यार्थ्यांकडून इजा होणार नाही याची त्यांनी काळजी घेतली. आता तर मुलांबरोबर शिक्षकांना देखील तिचा लळा लागल्याचे जाणवते. खर तर मुलांना शिक्षकांची भिती वाटते. पण या खारुताईला वाटत नाही. तिला आमची सवय झाल्याचे विद्यार्थींनीने सांगितले.