मुंबई: एका लग्नपत्रिकेत नगर दक्षिण लोकसभेच्या रिंगणात उभे असलेले भाजपचे उमेदवार सुजय विखे यांच्या नावापुढे निकालाआधीच खासदारपद लावण्यात आले असून हा सोशल मिडियावर चर्चेचा विषय बनला आहे. सोबतच त्यांनी विरोधी पक्षांकडून ट्रोलही केलं जात आहे.

नगरमधील श्रीगोंदा तालुक्यात येत्या 8 मे रोजी एक विवाह होणार आहे. या लग्नपत्रिकेत सुजय विखे यांचं नाव छापण्यात आलं असून त्यांचा उल्लेख 'संसद सदस्य भारत सरकार' असा करण्यात आला आहे.

माजी मंत्री राधाकृष्ण विखे पाटील यांचे पुत्र सुजय विखे भाजपकडून निवडणूक लढवत आहेत. राष्ट्रवादीने संग्राम जगताप यांना मैदानात उतरवून सुजय यांना आव्हान दिलं होतं. त्यामुळे संपूर्ण राज्याच्या नजरा या मतदारसंघातील निकालाकडे लागल्या आहेत. विखे समर्थकांनी मात्र आधीच आपल्या पद्धतीने निवडणुकीचा निकाल लावून टाकला असून हा चर्चेचा विषय बनला आहे.