नागठाणे - दै. ‘सकाळ’मध्ये प्रसिद्ध झालेल्या सुटीच्या कॅलेंडरपासून प्रेरणा घेत प्राथमिक शिक्षिकेने इयत्ता दुसरीची नावीन्यपूर्ण दिनदर्शिका तयार केली आहे. नव्या अभ्यासक्रमाच्या पार्श्वभूमीवर ती शिक्षक, पालक अन्‌ विद्यार्थ्यांसाठी उपयुक्त ठरणारी आहे.

सौ. ज्योती दीपक माळी असे या शिक्षिकेचे नाव आहे. त्या सातारा शहरालगत असलेल्या गोळीबार मैदान येथील प्राथमिक शाळेत कार्यरत आहेत.

उपक्रमशील, कृतिशील शिक्षिका असा त्यांचा लौकिक आहे. नुकतीच त्यांनी इयत्ता दुसरीच्या नवीन अभ्यासक्रमाची वर्षभराची सर्वांना संग्राह्य ठरेल, अशी दिनदर्शिका तयार केली आहे. त्यासाठी दै. ‘सकाळ’मध्ये प्रसिद्ध झालेले सुटीचे कॅलेंडर ही खरीखुरी प्रेरणा ठरल्याचे सौ. माळी नमूद करतात. ‘सुटीच्या त्या अनोख्या कॅलेंडरमध्ये मुलांसाठी दिवसनिहाय नियोजन करण्यात आले होते. त्याच धर्तीवर आपणही काही तरी करावे, असा विचार डोकावला. उन्हाळी सुटीत हाताशी वेळ होता.

विचार करायला फुरसत होती. त्यातून या दिनदर्शिकेने आकार घेतला. ही रंगीत, चित्रमय, लक्षवेधक दिनदर्शिका जून ते मार्च अशी दहा पानांची आहे. त्यात कृती, खेळ, अभ्यास, सराव परीक्षा अशा विविध उपक्रमांचा समावेश आहे.

तो शिक्षक, पालक तसेच विद्यार्थ्यांसाठी विशेष उपयोगी ठरणारा आहे. या कामी पती दीपक माळी यांच्यासह गटशिक्षणाधिकारी संजय धुमाळ, विस्तार अधिकारी प्रतिभा भराडे, चंद्रकांत कर्णे, केंद्रप्रमुख उज्ज्वला कुलकर्णी तसेच सहकाऱ्यांचे मार्गदर्शन लाभल्याचे त्यांनी सांगितले.