निपाणी : शहर आणि परिसरात चार दिवसापासून पडणाऱ्या दमदार पावसामुळे (Nipani Rain) तालुक्यातील अनेक गावांचे जनजीवन विस्कळीत झाले आहे. आज (ता. २६) सकाळपासूनच पावसाचा जोर वाढल्याने मांगुर फाट्यावर सेवा रस्त्यासह शेतीवाडीतील पाणी आल्याने दुचाकी स्वारांची तारांबळ उडाली.

शिवाय, महामार्गावरील (Pune Bangalore Highway) वाहतूक मंद गतीने सुरू होती. पावसाचे गांभीर्य ओळखून घटनास्थळी पोलीस प्रशासनासह महसूल विभागाचे अधिकारी पाण्यावर लक्ष ठेवून आहेत. गुरुवारी रात्रीपासून पडणाऱ्या पावसामुळे मांगुर फाटा (Mangur Phata) परिसरात शेतीवाडीतून पाण्याचे लोंढे वाहत आहेत.

त्यामुळे सतर्कता बाळगून पूर भागातील अधिकारी कर्मचारी थांबून आहेत. सौंदलगा हद्दीत मांगुर फाट्याजवळ कुंभार शेताजवळ महामार्गाला पर्याय म्हणून सुरू ठेवलेल्या सेवा रस्त्यावर वेदगंगेच्या नदीपात्रातील बॅक वॉटरचे पाणी आलेले नाही. कोकण फाटा आणि या परिसरात पाऊस वाढल्यास कोल्हापूरहून बेळगावकडे होणाऱ्या वाहतुकीवर परिणाम होण्याची शक्यता आहे.

सकाळच्या सत्रात प्रशासनाने काही काळ दुचाकी वाहनांना प्रवेश बंदी केली होती. पावसाचा जोर असाच राहिल्यास वेदगंगेच्या पाणी पातळीत वाढ होऊन बॅकवॉटरचे पाणी सेवा रस्त्यासह शेतीवाडी जाणार आहे. यावेळी मात्र प्रशासनाला एकेरी वाहतूक सुरू करावी लागणार आहे.