नगर ः दिवंगत लोकनेते बाळासाहेब विखे पाटील यांनी लिहिलेल्या "देह वेचावा कारणी' या आत्मचरित्राचा प्रकाशन सोहळा प्रवरा परिवारातर्फे आयोजित करण्यात आला आहे. या सोहळ्याचे निमंत्रण पंतप्रधान नरेंद्र मोदी यांनी देण्यात आले आहे. 

आमदार राधाकृष्ण विखे पाटील यांनी प्रवरा परिवारातर्फे नवी दिल्ली येथे संसद भवनात हे निमंत्रण दिले. त्या वेळी विखे पाटील यांनी साईबाबांची मूर्ती आणि शाल देऊन पंतप्रधानांचा सत्कार केला. खासदार डॉ. सुजय विखे पाटील या वेळी उपस्थित होते. 

पुस्तक प्रकाशन सोहळ्याचे निमंत्रण

दिवंगत बाळासाहेब विखे पाटील यांनी लिहून ठेवलेल्या "देह वेचावा कारणी' या आत्मचरित्रात त्यांच्या संपूर्ण जीवनगाथेचे वर्णन केले आहे. त्यांच्या आठवणींना उजाळा म्हणून हा सोहळा होणार असल्याचे सांगण्यात आले.

 
प्रवरानगर येथे आतापर्यंत देशातील सर्वोच्च सत्ताधिशांनी हजेरी लावली आहे. राजकारणासोबतच सामाजिक, साहित्यिक, कला, क्रीडा क्षेत्रातील मान्यवरही आलेले आहेत. 

दिग्गज प्रवरातिरी

राज्यपालांपासून राष्ट्रपतींपर्यंत सर्वांनीच प्रवरेला भेट दिली आहे. दिवंगत राष्ट्रपती ए.पी.जे. अब्दुल कलामही प्रवरेत आले होते. त्या सर्वांनीच विखे पाटील परिवाराच्या कर्तृत्वाचा गुणगौरव केला होता. खासदार डॉ. सुजय विखे यांच्या रूपाने विखे पाटील परिवारातील चौथी पिढी विकासकामाची धुरा पुढे नेत आहे.