सातारा : उदयनराजे भोसले यांनी खासदारकीचा राजीनामा दिल्याने सातारा लोकसभा मतदारसंघाची निवडणूक विधानसभा निवडणुकीबरोबर जाहीर होण्याची दाट शक्‍यता आहे. तसे झाल्यास त्याचा राजकीय फायदा कोणाला होईल, हे यथावकाश स्पष्ट होईल. मात्र, मतदारांना ते सोयीचे, तर एकत्रित निवडणूक पार पाडताना प्रशासनाची चांगलीच दमछाक होणार आहे. 

राज्यात सध्या पक्षांतराची लाट सुरू असून, त्या लाटेवर माजी खासदार उदयनराजे भोसले हेही स्वार झाले आहेत. दोन लोकसभा निवडणुकांवेळी "मोदी लाट' देशभरात पसरली असतानाही सातारा लोकसभा मतदारसंघातून राष्ट्रवादीचे उमेदवार उदयनराजे भोसले यांना राष्ट्रवादीच्या बालेकिल्ल्यात धक्‍काही लागला नाही. मात्र, लोकसभा निवडणूक होऊन तीन महिने उलटताहेत तोपर्यंत पक्षांतराची लाट जिल्ह्यात वेगाने आली. त्यात अनेक आमदार भाजपच्या गळाला लागले. तसेच उदयनराजेही भाजपवासीय झाले. त्यासाठी त्यांनी खासदारकीचा राजीनामा दिला. यामुळे सातारा लोकसभा मतदारसंघाची जागा रिक्‍त झाली असून, या जागेची निवडणूक सहा महिन्यांत नियमाप्रमाणे घ्यावी लागणार आहे. 

विधानसभा निवडणुकीबरोबर लोकसभेची निवडणूक होण्याची दाट शक्‍यता आहे. त्यामुळे प्रशासनाची चांगलीच दमछाक होणार आहे. इव्हीएम मशिन, व्हीव्हीपॅट आदी यंत्रणांसह सर्व साहित्य दुप्पट लागणार आहे. शिवाय, तेवढ्याच मनुष्यबळाचीही आवश्‍यकता लागणार आहे. हे मशिन ठेवण्यासाठी गोडाऊनची जादा आवश्‍यकता भासणार आहे. स्वतंत्र निवडणूक निर्णय अधिकारी, इतर अधिकारी, कर्मचारी नेमावे लागतील. त्यामुळे प्रशासनाला ही निवडणूक एकत्रित लागणार की काय, याची धास्ती लागली आहे. तरीही प्रशासनालाही वेगवेगळी तयारी करावी लागणार नाही, ही बाब प्रशासनाला आशादायक आहे. 

दुसरीकडे मात्र दोन्ही निवडणुका एकत्रित झाल्यास त्याचा फायदा लोकसभा निवडणुकीतील उमेदवारांना होणार आहे. शिवाय, राजकीयदृष्ट्या खर्च कमी होऊ शकतो. तसेच लोकप्रतिनिधी, कार्यकर्त्यांना दोन्ही निवडणुकांसाठी वेगवेगळी ताकद खर्च करावी लागणार नाही. त्यामुळे राजकीय वर्तुळात या निवडणुका एकत्रित व्हाव्यात, अशी आशा आहे. तसेच एकत्रित निवडणुकीमुळे मतदारांनाही मतदान करणे सोयीचे होणार आहे.