बेळगाव : कॅन्टोन्मेंट बोर्डाने अखेर आजपासून विनामास्क फिरणाऱ्यांवर कारवाई करण्यास सुरवात केली आहे. पहिल्या दिवशी ९५ जणांकडून नऊ हजार ५०० रुपये दंड वसूल करण्यात आला. ही कारवाई सुरूच राहणार असल्याची माहिती कॅन्टोन्मेंट बोर्डाच्या सीईओंनी दिली.

कॅण्टोन्मेंट बोर्डाच्या हद्दीत विनामास्क फिरणाऱ्यांवर कारवाई करण्याचा निर्णय दोन महिन्यांपूर्वी झालेल्या बोर्डाच्या बैठकीत 
घेण्यात आला होता. मात्र, कॅन्टोन्मेंटकडे मनुष्यबळाची कमतरता असल्याने ही कारवाई दोन महिने रखडली होती. अखेर शनिवारी याला मुहूर्त  मिळाला आहे. विनामास्क फिरणाऱ्या प्रत्येकाकडून १०० रुपये दंड आकारणी केली जात आहे. शनिवारी दुचाकी, चारचाकी वाहनधारकांकडून नऊ हजार ५०० रुपये दंड वसूल करण्यात आला.

हेही वाचा - जीवनसाथीच ठरला वैरी ; दोरीने गळा आवळून गर्भवती पत्नीचा केला खून -

कॅण्टोन्मेंट कार्यालय ते आयनॉक्‍स थिएटर या दरम्यान ही कारवाई करण्यात आली. यानंतर रोज ही कारवाई केली जाणार आहे. कारवाई करताना बोर्डाचे १० हून अधिक अधिकारी व कर्मचारी उपस्थित होते. अनेकांनी अधिकाऱ्यांशी हुज्जत घालण्याचा प्रयत्न केला. मात्र, अधिकाऱ्यांनी समजावून सांगितल्यानंतर त्यांनी दंडाची रक्कम दिली.

आता कॅन्टोन्मेंट हद्दीतही विनामास्क फिरणाऱ्यांवर कॅण्टोन्मेंट बोर्डाची नजर असणार आहे. कोरोनापासून स्वतःच्या बचाव करण्यासाठी मास्क गरजेचा आहे. मास्कचा नियमित  वापर करा, अशा सूचना सरकारने केल्या आहेत. तरीही कॅण्टोन्मेंट हद्दीत विनामास्क फिरणाऱ्यांची संख्या मोठी आहे. अखेर कारवाईला सुरवात झाली आहे. लोकांना आता मास्क घालावाच लागणार आहे.

हेही वाचा - मतदारांना दिलं जातंय आमिष ; तीन दिवसांच्या वेतनासह प्रवास खर्चही -

संपादन - स्नेहल कदम